default-output-block.skip-main
National | ASB Polyfest 2022

Ahakoa ngā “hōhā” o te mate kōwheori, ka kitea tonu te ihi i te Polyfest

Ahakoa ngā uauatanga o te wā, ahakoa te heke o ngā roimata o ranginui, i tū mārō hītararī tonu ngā kaihaka i te whakataetae Polyfest.

Koinei te wā tuatahi i tū te hui nei, kaimātakitaki kore. Nā taua āhua i tū i pakipaki ngā kaiwhakawā i te whakaeketanga o ngā kaihaka ki te papa whakatū waewae, kia pakipakitia rātau, ahakoa te itiiti noa o te hunga rā.

Ko Jeff Ruha te pouako o Rutherford College. Tekau mā rima tau ia e mahi ana i ēnei mahi, ā i rongo ia i ngā uauatanga o te whakarite i tana kapa i raro i ngā here o te mate kōwheori.

“Hōhā katoa tēnei āhuatanga nē! i te haratau tuarua, iso katoa te kapa!” te whiu a te uri o Te Tai Rāwhiti.

Ahakoa taua āhua, i kite ia i te hua o te tū, i raro i ēnei āhuatanga taumaha.

“Ae kaore ngā tangata e tae ā tinana mai, ēngari kei te mōhio marika mātau, e hoki ana ki te whakataukī o Te Tai Tokerau, Kua tawhiti kē to haerenga mai, kia kore e haere tonu. Koinā ngā mahi o ngā tamariki, koinā te mea nui, ka tū rātau mō te āke tonu atu i runga i tērā whakataukī, nō tawhiti kē tō rātau haerenga mai.”

Tekau mā ono tau a Rahera Herewini-Mulligan e whakariterite ana i ngā mahi o muri, mō te Polyfest. Ko ia i tino kite i te mimiti o ngā tauira i whai wāhi mai i tēnei tau.

“I ngā tau kua pahure, 50 ngā kura kua tū ki te atāmira. I tēnei tau, 18.” Tā Rahera.

Ahakoa ngā uauatanga, he painga hoki i toko ake ki roto i ngā āhuatanga o te wā.

“Ia tau ka haere mai tētahi ki ngā kēti, me te kī, anei ngā tarau, anei ngā taonga, anei, anei, kei te pīrangi au ki te mihi ki taku tamaiti.” Tā Rahera, i runga i te ngākau pukukata.