default-output-block.skip-main
Politics | Jacinda Ardern

E whakapono ana te rōpū Māori o Reipa ko Hipkins rāua ko Sepuloni ngā rangatira e tika ana

I te rangi nei, ka whakaeke ngātahi Te Rōpū Reipa ki runga i te pā o ngā Ariki ki Ratana, ki te whakatairanga i te hononga i waenganui i a rātou me te iwi Morehu.

Ka mutu, kia tūtaki hoki ai te iwi ki ngā rangatira hou o te rōpū me te mihi ki ngā rangatira kua heke iho i ngā turanga kaiārahitanga.

“E harikoa katoa ana mātou e kawe ana te pirimia hōu, e whakawātea ana te pirimia o mua, e pai ana i te mea pai te huri atu i a Jacinda mai ki a Chris Hipkins,” hei tā Kelvin Davis mema mō Te Tai Tokerau.

"Kua rite mātou ko Chris Hipkins tō mātou nei tumuaki, tangata kaha ia. E hiahia ana mātou ki te anga atu ki te pōtitanga a te mutunga o tenei tau,” hei tāna anō.

E kaha whakapono a Kelvin ko te kaupapa te matua, kaua ko te kiri o te tangata.  E whakaae ana te mema Māori o te tūru auraki o Te Raki a Willow Jean Prime ki tēnā kōrero.

“Ehara ko te tangata ko te kaupapa kē te mea nui, he nui kē atu te kaupapa i a tātou i tētehi tāngata nō reira kō wai ngā tāngata tika ki te ārahi i a mātou o te rōpū Reipa mō tēnei wā, arā ko Chris rāua ko Carmel,” hei tā Willow Jean Prime.

“I heke mai a Jacinda mai i tāna tūranga, he tūranga e wātea ana, i mahi ngatahi, i whakakotahi mātou, hei aha ai? Mo te kaupapa, mō te wini hei te Oketopa e tū mai nei,” hei tāna anō.

“Nō reira e tautoko ana mātou i tō mātou rōpū katoa, pau te kaha, kore kau he mea nui ki a mātou, kahore he Māori i tērā o ngā tūranga.”

Public Interest Journalism