'He maha ngā auetanga' – Minita Take Aorere e pā ana ki ngā taumatanga ki Tonga

By Heta Gardiner

Kei te whanga atu te pūtea tautoko, ēngari ko Tā te Minita Take Aorere, ko tā Nanaia Mahuta, ko te mataku, kei te mata o ngā whakaaro. “He maha ngā auetanga ki roto i a rātau, nā runga i te tino, i te mataku tonu, ki ngā āhuatanga e pā ana ki te rū moana.”

I  puta te kōrero ā te Pirmia inanahi, ka tuku te kāwanatanga i te pūtea tautoko, $500,000 te rahi, ki te tautoko i a Tonga, whai muri i te rū moana i pā ki a rātau i te rāhoroi. Ko tāna, he timatanga noa tēnei. Ā ko tā te Mema Paremata mō Hauraki-Waikato, kei te aro hoki ngā whakaaro ki te pae tawhiti, kāore ki te kaupare i ngā taumahatanga o te wā anake.

“Koia te take kei te piri mātau ki te kāwanatanga o Tonga, kia arotake i ngā āhuatanga o reira, kia mātua mōhio me pēwhea e tāea, te tuku i a mātau nei āwhina, i tēnei wā, tatū atu ki te wā hei whakatikatika nei i a rātau nei hapori, ngā āhuatanga e pā ana ki ngā whanaunga.”  

Ahakoa te whakaaro nui ki te hunga kei Tonga, kei reira tonu ngā āwangawangatanga.

“Ko ngā ripoata kua tau mai ki a mātau, kāore he mate i tēnei wā, ēngari kāore i whakawhānui ake te titiro ki ngā moutere, ki te taha o Tonga, nōreira kei te tatari tonu mātau.” Tā Nanaia Mahuta.