“He mahi huna pērā ki te taniwha.” Kei te puku te rae o Kahurangi Naida Glavish, ki ngā mahi uruuru ki waenganui pō ki Mataharehare.
Ka kore raw hoki ia mō te noho puku noa.
E wheke ana a Kahurangi Naida i te uruuru o ngā kaimahi a te Manatū Taonga ki te whenua i waenganui pō, ki te hūnuku whakamua i ngā mahi whakatakoto kōhatu maharatanga ki ngā pārurenga o Erebus.
“I tae mai rātau i te toru karaka i te ata. Mahi kuhu, mahi huna. Pērā ki te taniwha,” koirā tā Tā Kahurangi Naida ki a Te Ao Mārama.
Kua roa tēnei take e tohea ana, kei tōna ito ko te haumaru i tētahi rākau pohutukawa kei te whenua. E ai ki ngā kaiporotēhi, ka takakinotia i te whakatakototanga o tētahi kōhatu maharatanga, ki te hunga i mate i te parekura Erebus i te tau 1979.
Ko tā Kahurangi Naida, he wā, he wāhi anō hoki, ki te tuku whakaaro ki a rātau. “Mauria mai ētahi kōhatu, hei patu i te mauri o te rākau nei, hei maumahara ki a wai? Ka mutu, kīhai taua aituātanga i pā mai ki konei. Tēnā aituātanga, nō te tonga kē.”
Ēngari ko tā te Manatū Taonga, “E korekore te pohutukawa kei te kōrerotia e whara. Ka haumarutia, ka manaakitia, haere ake nei.”
Me te aha ko tā rātau “I tomohia te whenua i raro i te kohu o te pō, ki te whakahaumaru i ngā kaimahi, kaiporotēhi, te hapori hoki” Ā “Kei te ū tonu te Manatū Taonga ki te whakatakoto wāhi maharatanga, mō te hunga i mate i te parekura Erebus. Ko ngā tāngata 257 i mate i taua parekura, kei te mata o ngā whakaaro.”
Kua kītaurangi atu hoki te Pirimia, me te kī, e korekore te rākau Pohutukawa e raweketia.