'Kaua e tautau ō koutou raho i ō mātou wai'

By Waimanea Nuri

E takariri ana ngā whānau o Te Whakarewarewa, nā te kitenga o ngā whakaahua o ngā hunga tauiwi e kauhoe ana i te pare o Parekāwhio (The Bluey’s).

Hei tā te uri o Tūhourangi, tā Ringahora Huata, he taonga whakahirahira te pare o The Bluey’s ki ngā whānau o Whakarewarewa.

“Mai rānō tēnei pare e hirahira ana, mai i te taenga mai o ngā tūpuna ki konei. Ko tētehi o ngā tino ture, kia kaua mātou e kaukau i te puna, me tatari kia kati a Te Puia, kia kaua ngā tūruhi e kite atu i a mātou”.

Hei tā Ringahora, he nui ngā āhuatanga e whakaaetia ana me ngā mea kaare hoki e whakaaetia ana, arā he nui ngā tikanga me ngā kawa o tēnei wāhi. Heoi e mārama ana te katoa o ngā uri o Tūhourangi ki tēnei tūāhuatanga.

“Ka ahatia e koe mehemea ka tae atu ahau ki roto i tō whare, kai ai i ō kai? He ōrite tēnei, kai te tū koe i tō mātou whenua, i tō mātou kāinga.”

He pakihi ngāwhā/puia a Te Puia e pātata ana ki Whakarewarewa, hei tā te Tumu Whakahaere, tā Eraia Kiel, e whakaae ana ia ki ngā kōrero, i hari atu tētehi kaiārahi o Te Puia ki te pare o Parekāwhio, The Bluey’s.

“I te wā o te Kowheori, he nui ngā hekenga i tō mātou mahi pakihi, ā, mā tērā i kaha whakaaro mātou me pēwhea te ū tonu ki ngā mahi. Nā tērā, i haria mātou ngā hunga ki te pare, ki te tarata o te Pohutu hoki”.

E ai ki a Eraia, e mārama ana ia ki ngā āwangawanga o te haukāinga.

“Kaua e āwangawanga, kāore a Te Puia i te ārahi i ngā ‘pahi’ ki te pare rā”.

E ai ki a Chanz Mikaere, kāore e taea te whakahē te ūnga atu o ngā tūruhi ki te pare.

“E ai ki tētehi o aku whanaunga, i hū tōna toto, pērā ki te Korotiotio (He puna wera tino whakahirahira), ā, e tino whakaae ana au ki tērā.”

Ko te whakahau a Mikaere ki te hunga rāwaho “Kaua e tautau ō koutou raho i ō mātou wai”.