default-output-block.skip-main
National

Kei te puawai mai ngā rangatira o āpōpō i Te Arawa

Tokowhā ngā rangatahi o Te Arawa e nanaiore nei ki te hāpai i ngā mahi nui a te iwi. E whakataetae ana rātou mō tētehi tūranga i runga i te Te Tatau o Te Arawa, te poari a te iwi e mahitahi ana ki Te Kaunihera o Ngā Roto o Rotorua.

Ko Te Waiarangi Merito (Ngāti Whakaue, Ngāti Pikiao) tētahi. Hei tāna, he nui ōna wawata, ko te whai ara e tika ana mō ngā uri o Te Arawa, otirā mō Ngāi Māori.

“Mōku ake, he hīkaka tōku ki te whakawhanake i ngā tūāhuatanga i ēnei tūranga poari mō ōku whānau, me ōku iwi”.

Hei tā Tara Sears (Te Arawa), he kaha tōna waiaro ki te ū ki ngā mahi māra kai, ki ngā mahi whakapiki i te taiao o Te Arawa waka.

“Me he tino whakaaro ki ō tātou tūpuna, tino mōhio ai rātou me pēwhea te ora i te whenua. Mehemea e taea ana e rātou, koinā taku hiahia. Kia whakahoki mai i ērā mātāpono ki ngā uri katoa o Te Arawa waka”.

Kei te whāia e Sears he tūranga ki a Te Tatau o Te Arawa hei pāinga mō ngā uri whakaheke. photo/file

Mō Kahutapeka Ututaonga, nā tōna whānau ia i kaha akiaki i āna mahi katoa.

“Ko taku whānau kai te pitomata o ōku whakaaro, i ngā wā katoa! Mō aku tamariki, aku mokopuna me ngā reanga e ara tonu ake nei”.

Hei tā te Tumu Whakahaere o te poari, hei tā Jude Pani, ahakoa kua tae te wā mōna ki te wehe i ēnei mahi, kei te manawarū ia mō te anamata o te iwi.

“Nā ēnei rangatahi ahau e hikaka ai, he kaha anō tā rātou ki te ū ki ngā mahi, te ū ki ō rātou wawata, me te ū ki ngā whakawhanaketanga o Te Arawa waka”.

E ai ki te uri o Ngāti Whakaue, ki a Maringi James, mehemea he wawata tāu, me whai atu!

“Ki te hiahia koe kia haere mō tētehi tūru, mahia, kaua e āmaimai, kaua e āwangawanga. Mehemea e hiahia ana koe kia rangona tō reo, mahia.”