Kei te whakamiha a Willow-Jean Prime, te Minita tuarua o Manatū Taonga, ki te tautoko nui a ngā tūao nō ngā iwi o te motu i te kaupapa o Te Matatini.
Hei tāna, kei pōhēhē te tangata, ka raru te kawe i ngā mahi a te taiopenga nā te iti o ngā moni.
Heoi e whakapaetia ana, tōna 2,000 ngā pou whirinaki i tēnei tau.
Ā, e kiia nei e te minita, ka ora a Te Matatini i te hapai ō, arā ko ngā tūao e tiaki ana i ngā kaimātakitaki, i ngā kaihaka, i ngā kaitautoko katoa.
Kua tū hoki te ringa o Prime ki te kōkiri i te tono kia whakanui ake te pūtea a Te Matatini i roto i te tahua a te kāwanatanga a te marama o Mei.
"Ka mahi ngātahi tonu mātou ko te poari, kia tutuki i ngā wawata mō te kaupapa whakahirahira nei, otirā mō ngā kapa haka katoa.”
He kaihaka o mua a Prime, ā, hīkaikai ana ia ki te tū o te kaupapa nei hei mātakitaki i ngā kapa katoa.
"Ko te 2005 te tau whakamutunga o taku tū ki te atamira. Nō reira e koa ana te ngākau kua tae atu ahau ki Te Matatini hei Minita tuarua o Te Manatū Taonga."
Ā, kāore he whakapai kanohi nōna ki tētahi kapa kotahi.
“He nui rawa ngā kapa whakahirahira i tēnei rā, otirā i tēnei wiki. Ka mihi rā ki ngā kapa katoa i tū."