default-output-block.skip-main
National

Ko te ihu o Ngā Puna o Waiorea tērā i puta I te whakataetae hākinakina o Te Māhepohepo

I whakakao anō ai ngā kura o Tāmaki Makaurau ki Papakura, e whakaara anō ai te whakataetae hākinakina o Te Māhepohepo.

Ko Ngā Puna o Waiorea rātou ko Ngā Tapuwae i te mura o te ahi i ngā whiringa toa i te taha ki te poitarawhiti me te whutupōro rīki. A i te mutunga iho ko Ngā Puna o Waiorea tērā i eke pānuku.

Heoi, hei tā Hammond Matua o Te Kura Tuarua o Pūtake, ko te mea nui kua kōtahi anō ngā kura.

Kua rima tau a Te Māhepohepo e moe ana i ngā pēhitanga huri noa i te ao, mātua rā ko te mate kōwheori. “Mōku ake otirā mō ngā kura i tae mai i te rangi nei, ko te tino hiahia kia rewa te kaupapa.”

Neke atu i te toru rau ngā tauira me ō rātou kaiako nō te kura o Ngā Tapuwae, Te Kura Kaupapa Māori ā-rohe o Māngere, Te Kura Tuarua o Pūtake me Ngā Puna o Waiorea i tae atu ki te whakataetae.

Ko te hiahia nui o ngā kura kia ora mai anō ngā pīkautanga a te Māori mā roto i te nohonga tahitanga.

“Koia rā te tino ia o tēnei kaupapa. Hei whakahuihui i ngā kura Māori, kia Māori ai te kaupapa, kia haka ai te haka, kia rongo i te tatūtanga mai o te wairua Māori.”

Hei tā Carlena Matua o Te Kura Tuarua o Pūtake, “koia rā te pai o tēnei rangi, kei te whakatetae engari i runga tonu i te māhepohepotanga.”

I tōna tekau mā rima tau ki muri tīmata ai te kaupapa o Te Māhepohepo, ā, i tū hei kaupapa whakakaha ake I ngā hanganga o te ao hākinakina. He kaupapa tēnei e aro nuitia ana ki te oranga o te tinana, ki te oranga o te reo ka mutu ko te whakapakari I ngā pūkenga kaitātaki I te ao hākinakina.

E kī rā te kōrero ‘Anō te pai, te āhuareka o te nohotahi a ngā tuākana me ngā teina i runga i te whakaaro tahi.’

Ko te rata mai o te hunga rangatahi ki ngā āhuatanga o te whakawhanaunga atu ki ō rātou hoa nō kura kē atu me te tākaro hākinakina te toa o te rā, otirā, ko ngā rangatahi e mahi ana i ā rātou mahi hei painga mō te katoa.