Ko ngā hapori ka mate i te mahi nui ki te hūnuku marae, te whakamarumaru rānei i ngā marae hei ngā rā ki tua, ka whai hua nui i te kimi āwhina i te mātanga, e ai ki tētahi kaiwhakahaere Māori o Pouhere Taonga.
Ko tā Dean Whiting ki Te Ao with Moana, he "tino whai whakaaro" te mahi a tētahi o ngā marae nō roto mai i te hōtaka, ki te "kimi pū i ngā whakaaro o ngā mātanga kia aro ki tēnei take."
He kōrero nāna e hāngai ana ki te marae o Mirumiru i Te Tai Hauāuru o Te Ika-a-Māui, kua kimi kōrero āwhina i a NIWA mō te tūpono, he waipuke, he horowhenua te hua o ngā panonitanga ki te āhuarangi.
Ko te kōrero a Whiting, ahakoa he mea nui te pūtea hei hūnuku, hei whakakaha rānei i ngā marae, he taonga te āwhina a te mātanga kia āhei ai ngā marae ki te whakatakoto huarahi atu ki tua rā anō.
"Matua rā, hei hoa haere i te taha pūtea, ko te kimi whakamārama i ngā mātanga, ko te āta kōrero hoki i tōna wā anō, kia mārama ai ngā hapori ki ngā ara e wātea ana, ki te whai whakaaro ki aua ara, ki te whakatakoto mahere tōmua anō hoki. Ā, ki ōku whakaaro, ko ngā mahere e kōrerotia nei, ka neke atu pea i te 10, te 30, te 50 ki tua.
"Ko te whai whakaaro ki tua noa atu te mahi i tēnei wā, engari kia tika ai te momo mātauranga hoki e tōia ana ki ngā kōrero."
Ko tā te Kaunihera Māori o Pouhere Taonga, he "āwhina i ngā whānau, hapū, iwi ki te tiaki, ki te whakahaere hoki i ō rātou rawa tuku iho."
Mātakitaki i te kōrero a Te Ao with Moana ki te kaiwhakahaere Māori o Pouhere Taonga, ki a Dean Whiting.
Wāhanga 1: Ngā take mō te tiaki marae i te ahi
Wāhanga 2: Tahua Oranga Marae me te mana ahurea o ngā marae
Wāhanga 3: Take ahurea, mana wairua hoki mō te hūnuku marae, te āhuarangi, te whai hua o ngā tohutohu a te mātanga
