$300 miriona tāra te utu o tētahi whare herehere hou ka tū ki Tāmaki

Mē aro kē te titiro ki ngā take e uru atu ai te tokomaha o Ngāi Māori ki rō whare herehere, kaua ki ngā mahi whakatū i whare here whakatiki. 

Koina te whakatau a Naida Glavish, heamana o Ngāti Whātua, i te whakarewanga ake o ngā mahere a te kāwanatanga mō te whakatū  whare herehere whakatiki hōu ki Pāremoremo, i Tāmaki Makaurau.

Ka tū tēnei whare herehere o Te Ara Poutama Aotearoa ki te wāhi e tū nei te whare herehere tawhito o Tāmaki i tūwhera i te tau tahi mano e iwa rau, e ono tekau mā waru, i nohia ai ngā mauhere wairangi o Te Tai Tokerau.

E ai ki te kaikorero o te mana whenua a Naida Glavish me āro kē tā tātou titiro ki ngā take e uru ai te Māori ki ro whare herehere. Hei tāna, "kaua e tatari kia tae ake o tātou tamariki ki konei, katahi anō ka whakaaro pēhea te rapu he huarahi puta, tiakina i te wā kei roto i a tātou anō."

E rua rau ono tekau ngā tangata ka noho ki roto i tēnei whare herehere hou. E toru rau miriona tāra te wāriu, ā, e manako ana te kawanatanga ka heke ngā tatauranga o ngā tāngata ka uru ki roto i ngā whare herehere mā te rua tekau mā rima ōrau.

Kā tīmata ngā mahi hanga a te marama o Hakihea, ā e manakotia ana ka whakatūwherangia a te tau rua mano tekau mā waru.