He whakataetae kapa haka a rohe a Tamararo, e whakamahara ana i a Karaitiana Tamararo. Hakoa kua tohua ngā kapa e rima hei whakakanohi mai i te rohe o Te Tai Rāwhiti ki te whakataetae a motu a tērā tau, he hohonu ake te kaupapa a Tamararo i te whakataetae.
Ko Whāngārā mai Tawhiti te whakaihu waka ki Tamararo, huro ana te iwi whānui i te rere o ngā reo pārekareka.
Hei tā Derek Lardelli - Whāngārā Mai Tāwhiti, “Kei te hao tonu te ngākau i te mea kāre au i tā i tēnei tau, ēngari rā ko taku rōpū i eke panuku, i eke ki te taumata i te rā nei.”
Pakari ana te tā a te kapa o Waihirere, a, i riro anō i a rātou he tūranga ki Te Matatini. Ko rātou anahe anō te kapa kua eke ki ngā papatū waewae katoa o te whakataetae ā motu.
Ko tā Willie Te Aho - Waihirere Māori Club, “Rikarika katoa te ngākau i ngā mahi kua mahia i waho i te atamira, i ngā kaupoi i raro i a Harata Gibson, rātou mā a, mei kore ake rātou, tuarua ka nui te mihi atu ki ngā kaumatua i konei, nā ratou tēnei kaupapa i tīmata.”
A, hoki ora mai ana Te Pariha o Hikurangi. I kawea ake e Te Pariha o Hikurangi tō ratou whakaaraara, "Whakarukea! Tu tonu maunga Hikurangi, tuohu ko nga uri e!"
Riro ana i a ratou te turanga tuatoru.
Hei tā Ngarimu Parata - Te Pariha o Hikurangi , “Oh i tēnei wā ahua pau te hau, engari i mua tata i tō mātou tū ki te atamira, well kei te kapakapa te ngākau, ērā tūmomo āhuatanga katoa.”
Tae tuawha mai ana ko Tū Te Manawa Maurea, nō Manutuke, e riro ana i a rātou he tūranga anō ki Te Matatini.
Ko tā Dayne Hollis - Tū Te Manawa Maurea, “He nui ngā mahi kei mua i a tātou katoa, ko te anga whakamua a iwi, a whanau, a Rongowhakaata, a Ruapani a wai atu a wai atu, ko ngā kaitiaki o te hono tapu o tēnei rohe nei.”
Ko Te Aitanga a Hauiti ki Uawa i whiwhi te turanga tuarima ki te whakataetae a motu a tērā tau.
