E kore rawa ngā whānau Māori kei Ahitereiria e whai oranga ana e whakaaetia kia hoki ki te Taitokerau mehemea ko te keri maina tā rātau mahi.
Koinā te whakatae a Bryce Smith, o te whakaminenga o ngā hapū o Ngā Puhi i puta whai muri i tētahi hīkoi i tū ki Te Reinga i te Rāhoroi ki te whakaputa i ō rātau āwangawanga ki te kāwanatanga.
He kaupapa wenerau te keri maina i roto o Aotearoa i waenga i ngā hapū o Te Taitokerau, otirā ki Whangaroa.
A, nā te whakaaetanga a te Kāwanatanga i te kamupene hinu a Statoil ki te whāwhā i Te Reinga, he karere tā rātau ki ngā whānau Māori e noho ana ki Ahitereiria i roto i te ao maina.
E hia kē rau mano tāra o te koura me te hiriwa kei Whangaroa, kāre anō kia kitea.
E pōhiri ana a Bryce Smith o Te whakaminenga o Ngā Hapū o Ngā Puhi ki te hunga Māori e noho ana ki Ahitereiria ki Te Taitokerau, hēoi, e whakahē ana ia i a rātau e hiahia ana ki te keri maina.
Hei te Rāpare ngā hapū o Te Taitokerau ka whāriki ō rātau āwangawanga ki Waitangi.
