Ahakoa ngā mahi porotū ka haere tonu ngā mahi a Stat Oil

Mārakerake te kite, ko Aotearoa tētahi o ngā whenua e āta tirohia ana e ngā pakihi Kohinu o te ao, i te pōītanga mai o ngā māngai whā rau neke atu, i ngā whenua maha o te ao, ki te Hui Taumata Kohinu o Aotearoa.

Ahakoa ngā mahi porotū a tētahi rōpū ono rau inanahi i te rā tuatahi o te Hui Taumata, i rere tonu nga kupu tao i te ra nei kia 'waiho ia papa Moana'. Ko tā te minita take Pūngao a Simon Bridges, he moemoea noaiho tēra tumanako o rātau.

Riringi ana ngā pere a tētahi ope porotū i uru pokanoa atu ki te hui Taumata Kohinu o Aotearoa i te ata nei, ki te whakahē i ngā mahi kēri kōhinu i mua tonu i te aroaro o te Minita take Pūngao a Simon Bridges.

Ko Stat Oil, he Pakihi Hinu o Nowēi, tetahi o ngā Pakihi kua tīmata kē te tirotiro haere i ngā rauemi kei te whenua nei.

I whakaaetia te hoparatanga o ngā papamoana kotahi mano kiromita pū rua i te taitokerau.

I raro i ngā ture here a te kawanatanga, me kōrero tahi ki ngā iwi mana whenua, kei ngā takiwa e hoparatia ana, me te mea nei, kua whakangāwari ake ai te kāwanatanga me te runanga māngai ā Iwi, i te ara e tutuki ai tēra whāinga.

E waru ngā rohe whānui hou i whakatuwheratia hei horapatanga mā ngā pakihi Kohinu i tenei tau, e matapaetia ana ka piki ake ano tēra tatau hei ngā marama tata.