Ahakoa tana tokoiti haere, e anga whakamua tonu ana te Hāhi Rātana

I ētahi wā ka ōrite pea te pā o Rātana ki te 'Ana o ngā Raiona', engari kotahi tonu te kaupapa matua ka paihere i a rātou.

Hei tā Waka Paama, “Āe, kei te haramai ngā rōpū tōrangapū kei te wātea mātou ki te mihi ake ki a rātau, ki te kī atu ki a rātou haere mai i raro i te kaupapa tūturu o tēnei hui, te rā whānau o tā mātou pāpā.”

Mārakerake ana te kite atu kua heke iho te tokomaha o te hunga tāngata e hoki atu ana ki te pā, engari e ai ki te hemana o te Hāhi, ehara tēnā i te āhuatanga hōu.

“Kahore mātou e āwangawanga tērā nā te mea kei te mōhio mātou ka piki ka heke te mahi mā mātou ki te mahi ngā mahi.”

“Ko ngā rangatahi ngā rangatira mō āpōpō, ki te kore tātou e whāngaihia te rangatahi, ka mate noa tō tātou hāhi.”

Hei ngā tau e whā e tū mai nei ka whakanuia te iwi Mōrehu i te rautau o te hāhi.

Hei tāna anō, “Hainamana mai, Pākehā mai, haere mai i te mea, koia ko te kaupapa o tō tātou pāpā, a Tahupōtiki Wiremu Rātana, he whakakotahi ngā iwi katoa.

Koia kē tana hiahia, nā reira mā tātou anō te iwi Mōrehu e whakatutukihia i taua āhuatanga.”

Tāria te wā ka mōhio te oranga o te Hāhi o Rātana nei, engari i tēnei wā ko te whakapono ki te wairua tapu te mea ka mau tonu ki te iwi Mōrehu.