All Blacks Sevens to debut new haka at Rio Olympics

He haka taparahi hou tā te kapa Ōpango Takiwhitu ka whakamānutia ki Ngā Taumāhekeheke Ōrimipia hei ngā wiki e rua. Nā te mūmū reo Māori, nā Scotty Morrison te haka i tito nā runga i te tono a te kaiako matua, a Tā Gordon Tietjens i ngā wiki tata ki muri.

Maruatata mai nei ngā taumāhekeheke Orimipia ki ngā Ōpango Takiwhitu.  Ā, kua whakaritea he haka taparahi hou mā rātou

Hei tā Morrison, “Nōku te waimarie i whakapā mai te kaiako i te kapa a Tā Gordon Tietjens ki tō mātou whānau kia riro mā mātou tēnei haka e waihanga.”

He kōtuitui i te kupu Māori tā Morrison i te rā nei. Mō te kapa Ōpango Takiwhitu te painga. Āe mārika e tātou mā, he haka hou kei te haere.

E ai ki a Morrison, “Te ingoa o te haka nei, e hoa, ko Tū te toa o te riri, mōhio tonu tātou ki ngā kōrero mō Tūmatauenga. Koia te ihoihotanga o te haka.”

Nā Te Manahau ngā kupu o te haka i tito, ā, kua riro mā Anaru Grant o te kapa haka o Ngā Uri o Te Whanoa ngā ā ringa e whakaako ki te kapa takiwhitu.

Ināianei, kua oti te whakatau a te kapa koinei kē te haka tuatahi ā rātou

Hei tā Morrison, “Ki te toa rātou, ki te whakaihuwaka rātou i roto i te taumāhekeheke o te ao, nā, koinei te haka ka hakaina e rātou hei whakanui i te toanga, hei whakamānawa i te toanga, te rironga i a rātou o te mētara koura.”

Me te aha, ehara i te mea he tauhou te kapa Ōpango Takiwhitu ki ngā tū tohu a te Māori

E ai ki a Morrison, “Mai rā anō te ahurea Māori e noho pūmau ana ki waenga i te kapa takiwhitu. A mohoa noa nei, ko te whakaaro kia whai rātou i tā rātou ake haka.”

He whakapae nō tēnei kāwai o Te Mātāwai, mā te ahurea Māori tonu te kapa Orimipia whānui o Aotearoa e eke ai ki tāwāhi.

Hei tā Morrison, “Ka whai i te pounamu, ka whai i te karakia, ka whai i te korowai, ērā tū tohu a te ahurea Māori ka utaina atu ki runga i tērā kapa mei kore e tūpono ka riro mā te wairua Māori rātou e kawe ki te taumata o te ao.”

Kia tūrou hawaiki ngā Ōpango Takiwhitu i tā rātou whai i te mētara koura.