Kua oti ngā whakaritenga o Ngā Mamaku mō te whakamātautau tuatahi ki a Ahitereiria āpōpō. I kōrero te kaiako a Glen Moore ki ā mātou i te rā nei.
Tokorima ngā kaitākaro hou kua whai wāhi atu ki te kapa Mamaku mō te whakamātautau tuatahi ki Poihākena āpōpō.
kua whakaingoatia te topatahi a Ruahei Demant me te parirau a Alena Saili ki te aro a-kapa. Ko Cristo Tofa, rātou ko Leilani Perese ko Krysten Cottrell ka noho ki te pae hihiri.
Inā ngā kanohi hou, kua kore te kaiako a Glenn Moore e tino aro ana ki tā Ahitereiria e mahi nei. Hei tāna ki te tino aro ki te hoariri ka taka tōna ki te hē, ka raru, ka hinga.
He mea nui tēnei mea te ahurea a kapa i te ao hākinakina. Ko te ahurea kua hanga e Ngā Mamaku he mea rite ki tērā o te whānau. Hei reira tau ai te noho o ngā torekaihuruhuru ki te kapa, aro pū anō hoki te katoa o te kapa ki te whāinga kōtahi.
Ko te aronga nui o ngā toa whakaihuwaka o te ao mō āpōpō kia piki anō i te kōunga o te tākaro. Ko tā Moore e whakapono ana, ki te aro pū ki te pikinga kōunga kāore e kore ka puta te ihu.
Hei āpōpō ki te taiwhanga o ANZ i Poihākena tuki ai Ngā Mamaku ki ngā Wallaroo o Ahitereiria, me te whakapae o Moore inā ngā whānau o ngā kaitākaro ka tae ā-tinana atu mātaki ai.
