Hei tērā marama kuhu ai te hautipua rīki a Manu Vatuvei karapū mekemeke i tāna whawhai ngaio tuatahi ki Ōtautahi.
152 ngā piro a Vatuvei mō te kapa Warriors, ka whawhai ia kia Dave "Brown Buttabean" Letele i te kāri taunaki i a Joseph Parker me Alexander Florez.
Kōtahi āna whawhai runaruna, he wikitōria ki te kaihow Ōrimipia, kia Eric Murray i te tau 2012. A kua tipu te hiahia kia kuhu anō ki te porowhita tapawhā. Whai muri i te wharanga o tōna iohere punga, i tukuna tōna karapū Super League, a Salford i a ia, a kua hoki anō ia ki te mekemeke, kia noho whiti tonu ia.
Kua puta a Letele i te rītaiatanga. Ko te whai wāhi ki te whakatairanga i tōna ratonga whawhai momona te take i pērā ai. Hei tāna, hoki atu hoki atu e tono ana ētahi kia hoko anō ia ki te rīngi, engari auare ake, heoi mā te aha i a Manu Vatuvei e kōkiri anō tōna kaupapa.
Kua roa a Letele e hāpai ana i ngā hāpori ki te patua i te mate momona. Hei tāna, ko tōna 1000 tangata ka tae atu ki ngā momo whakangungu ia wiki, a ko ētahi i noho huna ki rō kainga nā runga i te whakamā, ā nā ōna mahi rātu i whai oranga hou.
Hei tā Vatuvei, kua roa ia e ngākaunui ana ki ngā mahi a-hāpori, a i te tono a David Higgins, o DUCO me Letele ki a ia, i tere whakaae ia.
Kua kitea e Vatuvei i te oranga hou o roto i a Letele. He mea takahiri ko Manu Vatuvei te hoariri whakamutunga o Letele, nā runga i te mea ko tōna hoariri tuatahi ko tā Manu tuakana, ko Lopini. He 168kg te taumaha o Letele i taua pō i te tau 2014, ā, kei tōna 110kg ia inaiānei. Hei tāna, wai ka hua wai ka tohu? Nōna te maringa nui i taua pō, ā ka whai wāhi a Manu Vatuvei i te rānaki utu, me tāna i kī mai ēhara i te pai kia hinga ngā tuakana teina e rua, heoi ko te mea nui ko te kaupapa, a ka ngana ia kia pai tōna tū.
Hei tā Vatuvei anō, kei te tiro ia ki ngā tau i mua mehemea ka whai oranga ia i te ao mekemeke. Heoi, mō Letele koina tōna whawhai whakamutunga, hei tāna he nui tāna patipati ki tōna hoa wahine e kimi whakaae i a ia, ka mutu kāore pea e whai āheinga anō.
Hei te tekau mā rima o Hakihea tuki ai rāua ki Horncastle Arena, Ōtautahi.
