Budget 2016 - Māori dominated sporting codes lose out

Ko ngā hākinakina e muia nei e te Māori tētahi o ngā uto nui o te Tahua Pūtea i tēnei rā. Ko tā te Minita Hākinakina, tā Johnathan Coleman he tuku i te tekau mā ono miriona tāra mō ngā hākinakina reanga tuatahi mō te tūpono eke panuku hei Ngā Taumāhekeheke Orimipia rua mano rua tekau. Engari, ka pēhea e whai pānga ai ēnei tohanga pūtea ki te Māori?

Kāre he hēneti kotahi i te Tahua Pūtea e taunaki ake ai ngā hautoa tākaro taketake Māori o āpōpō.

Ko ngā tākaro taketake a te Māori tērā kei raro tonu e putu ana. Ko tā He Oranga Poutama e kii nei - kua whakatauirahia te aro kore a te Kāwanatanga ki ēnei momo tākaro.

E ai ki a Wiremu Mato o He Oranga Poutama, “Kāore e kore e pāngia ana mātou e te Tahua Pūtea. Engari, ko te nuinga o ngā mea i kōnei waiho ēnā kōrero mō ngā kaitōrangapū, mā mātou e haere tonu, e haere tonu i roto i ō mātou mahi.

Tuia ki tērā, kāore te rahi o ngā mētara koura a ngā kapa nō Aotearoa i te whakataetae waka ama ā ao i tērā marama i paku ngākau reka mai ai te Kāwanatanga ki tēnei hākinakina.

Hei tā Hoturoa Kerr o Tohunga Whakatere Waka, “Kia kitea e te Kāwanatanga te kaha o tēnei momo hākinakina, nā, kua kite nei tātou i roto i ēnei tau maha ināianei kua piki ake, kua piki ake, kua piki ake. Kua tae ki te wahanga, ki tēnei taumata e kiia nei ko Aotearoa te tino toa o te ao.”

Heoi anō tērā tonu ētahi i waimarie i te putanga mai o te Tahua Putea i tēnei rā

Ā, mohoa nei kua tangata whenua te patere mai o ngā pūtea ki a Pā Whutupōro Aotearoa. Kua poroa te pūtea reanga tuatahi, engari he pikinga nui kia whakatairanga i te tākaro

E ai ki a Joe Sprangers o Pā Whutupōro Aotearoa, “It wasn't specifically contingent on the outcome of the Budget released today by the Government. Sport NZ already knew what it was getting for distribution. But I would say at the moment, we're on a positive upward swing.”

Inā hoki te wero hākinakina Māori nui i tōna korenga i te Tahua Putea tuawaru a te Kāwanatanga Nāhinara.

Hei tā Kerr, “Anei tirohia ā mātou mahi i runga i te kore pūtea, tēnā, tukuna mai ngā pūtea kia eke ki ngā taumata e hiahiatia nei.”

Ko te āhua nei he tata ā raro, he roa kē ā runga mō ngā hākinakina Māori a haere ake nei.