Butler, Hutchieson dominate Māori Surfing Nationals

Rahia Timutimu

Ko te Kehu Butler, nō Ngāiterangi rāua ko Zhana Hutchieson nō Te Atiawa ngā toa whakaihuwaka i ngā whakataetae eke ngaru Māori, i eke panuku atu ki ngā one o Waitara i ēnei rangi tata.

Nā Waitara te karanga i te whakataetae eke ngaru mō ngāi Māori i tēnei tau, he waewae tapu te nuinga o ngā kaieke.

Nō ngā tōpito katoa o te motu ngā kaiuru ki ngā wāhanga tekau o te whakataetae, ko te katoa i tātāwhai kia eke ki ngā whiringa toa.

Ko Zhana Hutchieson nō Te Atiawa, i toa i te wāhanga ika ā whiro wāhine, ahakoa kāore ngā ngaru i eke i tāna i manako ai.

Ki te wāhanga ika ā whiro tāne, he pakanga ki waenga i te pāpā me tana tama.

Mo ngā tau rua tekau, neke atu, kua tae mai te pāpā, a Khan Butler ki tēnei whakataetae.

I te whiringa toa, i turaki te pāpā e te tama. I tae tuawhā mai a Khan.

I tae tuatahi mai te tama, a Kehu, i te wāhanga ika ā whiro.