Call to establish a female equivalent to Te Mata Punenga

Taroi Black

He rōpū tāne e tohunga ana ki ngā tikanga me ngā mahi wairua e hiahia ana ki te whakarewa i tētahi huarahi hoki mā te hunga wāhine. E whakapono ana a Tākuta Pou Temara he whāinga nui tēnei mā ngā wāhine Māori e nanaiore nei ki te pupuri i ngā tāonga tuku iho a te Māori. Heoi ara atu anō ngā whakaaro o māreikura mā.  

Ko te mātauranga hei mahi i ēnei tikanga ka tau ki tērā ka ākona, ka tohua rānei. Ko Te Mata Punenga, he tira tāne tekau mā rua e tohunga ana ki te mātauranga Māori me ōna tikanga. Ināianei ko te hiahia, kia hāpai hoki i te hunga wāhine.   

Hei tā Pou Temara no Te Mata Punenga, “Ka noho rātou ki te hanga i tētehi kohinga karakia." "Akene pea, ko ngā kaupapa e pā ana ki te wahine, pērā i te whakaora i te whare tangata o te wahine, pērā i ngā mate e pā ana ki ngā tamariki, i ngā mate e pā ana ki te noho a te tāne rāua ko te wahine."

E whakapono ana tēnei tohunga nō Te Waiariki a Rita Tupe, he huarahi tēnei hei whakakipakipa i te hunga wāhine, kia rongo hoki ai a rātou reo whakahei i roto i ēnei tūmomo mahi. 

E ai ki a Rita Tupe no Ngāi Tuhoe, "Pēnei i a Rose Pere, he mōhio ia ki ēnei momo kaupapa ki te taha o te taha wairua te whakapapa, he mōhio ia ki ēnei momo kaupapa katoa." "Engari kaua e aukatingia ngā tāne ki te tautoko i ētahi o ngā kaupapa, me mahi tahi rāua me te wahine."

Hei tā Tākuta Temara, ka tīpakohia te hunga mo te rōpū hou, ka tapaina ki Te Mata Pūihoiho, engari he whakaaro kaare e tau tika ana ki te katoa.

Hei tā Rhonda Tibble, "E tika ana mā te ure e kōrero me pēhea te uha? Ko ngā whakatūpatotanga kei roto, tukua mā te wahine ōna mōhiotanga ki te tūranga i te ruahine e whakaara."

E mārama ana Te Mata Punenga, he whakaaro rerekē tō tēna, tō tēna heoi anō ko te kaupapa nui, kia pupuri ki ngā kōrero tuku iho i tēnei āo hurihuri.