E whiti rere ana te kapa takiwhitu U18 wāhine ki Āketina mō ngā Taumāhekeheke o te Ao Rangatahi. Tokorua he karangatahi nō te riu o Waiapu, tētahi wāhi rongonui ake nei mō te whutupōro.
He whanaunga a Kalyn Takitimu-Cook me Azalleyah Maaka nō Rangitukia, i te riu o Waiapu, te wāhi i nohoia te tuahangata Ō Pango, a George Nepia.
Heoi, nō te whutupōro rā anō rāua tūtaki ai ki a rāua anō. hei tā Takitimu-Cook, tauira nō te kura o Manukura i Te Papaioea, i te akiaki ia i a Maaka kia hūnuku ki tōna kura, auare ake. Katahi ka tutaki tōna papa ki tā Maaka māmā, ki reira taka te kapa he hononga tā rāua, ā kua piri tonu rāua ā moroki noa nei.
Ō ngā kaitākaro tekau mā rua e whakakanohi ana i a Aotearoa i te whutupōro mō te wā tuatahi i ngā Taumāhekeheke Rangatahi, tekau he Māori. Nō te rangi nei hura ai te kapa i tētahi patu hei hoa haere mā rātou ki ngā Taumahekeheke Rangatahi tuatoru. Hei tā Takitimu-Cook anō, kua ū ki tō rātou hōpuni tuatahi i te tau 2017, timata ana i ngā kaiako, heke iho ki ngā kaiārahi.
He whānau kaitā tō rāua, e whitirere ana ētahi ki Āketina mātaki ai. Ahakoa ka āhua wehi rāua i ā rātou, heoi mei kore ko te whānau tautoko rāua e eke ki ngā taumata e noho nei rāua.
Ki te angitu rāua ki Āketina, ka kōtahi atu te whānau ki te marae. Hei tā Maaka, me pērā ka tika! E mōhio pū tonu ana a Takitimu-Cook ka aha tōna kuia, hei tāna ka whakarite tāna kuia i te marae, ka tono i ngā pāpara ki te puihi aru pōaka aha atu aha atu.
Hei te pō nei wehe ai ngā wāhine o Waiapu ki Buenos Aires, hei tērā wiki timata ai te whakataetae whutupōro takiwhitu e whakahoki ai te mētara koura te riu o Waiapu.
