Dame Te Arikinui Te Atairangikaahu remembered 10 years on

I hui atu te tini rau ki Waahi Pā ki te whakahoki mahara atu ki Te Arikinui Kahurangi Te Atairangikaahu, he hui ata, hei tohu i te rangi i mate ai te makau o te motu tekau tau ki muri nei. 

Nā te wāhi ngaro te Rā Wairua o Kahurangi Te Arikinui Te Atairangikaahu i ārahi ai i te atatū nei.

Kia tau ai te rongomau ki runga i ngēnei mokopuna tuarua a te Ariki Tapairu.

Hei tā Turongo Paki, “E tika ana kia iriirihia ngā tuarua, e toru o rātou, i runga i te rangi wairua o tō tātou Ariki.// Ora pai ana tōna wairua, kei roto tōna wairua i roto i ā mātou katoa, e rere tonu ana te wairua o tō mātou kuia.” 

E ai ki a Rahui Papa, te Heamana ō Te Arataura, “Nā Te Arikinui tonu tēnei kaupapa i whakatō mai i te wā o te koroneihana.  Ko tōna koroneihana toru tekau mā toru, e whakanui ai tēnā Koroneihana o tana pāpā o Koroki.”

Nō te tau rua mano mā ono, i mate ai Te Arikinui i te māuiui toimaha, i waenganui mai u tōna whānau kāhui ariki, i Tuurangawaewae marae.  E rongo tonu ana te marea i tōna wairua.

Hei tā Paraone Gloyne (Ngāti Raukawa), “Ka hoki anō ngā mahara ki te rā i ngaro i a ia, ana, kāore e kore e mahara ana tātou katoa te ao Māori me Aotearoa pea hoki, e mahara ana ki te wā, me te wāhi i reira rā tātou i te wā i rongo ai tātou kua ngaro a Te Arikinui.”

Hei tā Timoti Karetu (Ngāi Tūhoe), “He wahine manaaki nui mai i a ahau, otirā, i a mātou o Te Kōhanga Reo, he nui ngā whakaaro, ka haere mai nei ki tēnei marae ka hoki te mahara, he nui ngā mahara. Ka wherawhera haere i ngā whārangi o taku pukapuka maumahara, ae ka tangi te ngākau.”

Otira, i tikina mai ko te hunga pātata ki a Te Arikinui hei pānui i ngā karaipeture, hei kauwhau anō hoki

I runga i te āki a Kiingi Tuuheitia, i tū he karakia ki te aroaro o Mahinarangi whare ki te whakanui i te tau tekau nō te matenga o Te Arikinui, ā, ka tīmata atu ngā whakanui Koroneihana i te kawe mate o Tainui Waka i te Rāapa.