E ai ki nga tatauranga kei te pirau haere nga niho a ngā tamariki Māori me ēra o ngā moutere

Kua tino piki ngā kaute o te hunga nohinohi ka tukuna ki te hōhipera i te pirau o ngā niho, ā, ko ngā tamariki Māori me ēra o ngā moutere kei te tihi o ngā kaute.

He take tino mōrikarika tēnei hei tā ngā mātanga tiaki niho, me te aha ko te rongoä pea, ko te whakangāwari ake i te huarahi ki ngā takuta niho, te whai wai pūkōwhai, ko te kai tika me te horoi tika i ngā niho.

E ai ki te ripoata arotakenga a te Manatū Hauora, ko ngā tamariki Māori me ēra o ngā Moutere, i raro iho i te rima tau, kei te hōhiperatia mo ngā momo mate ka hua ake i te niho pirau. A ko tā ngā mātanga hauora niho, me awangawanga rā tātou ka tika.

Hei tā Papatuānuku Nāhi, “Ae ra he tino kaupapa tēnei, ko tētahi o ngā raru ko te inu mea o ngā inu reka, ngā fizzy drinks me kī.”

E ai ki te tākuta niho, a Scott Waghorn, “Ko te awangawanga kē, ahakoa to mātou taikaha ki te aruaru i ngā tamariki niho pirau inaianei, he maha tonu kei te raru i te niho pirau.”

He ngāwari noa iho ngā huarahi whai āwhina mai i ngā tākuta tiaki niho, na te mea kahore he utu mo ngā tamariki tae noa ki te hunga rangatahi, engari kihai i te arohia ake e to tātou iwi.

Mo ngā pakeke ko te putea te raru e ngoikore nei te iwi Māori ki te haere ki te rata niho, me haere ngā taitamariki ki te rata niho o te wā o te tamarikitanga, na te mea horekau he utu mo te rata niho.

E mea ana a Scott Waghorn, “Ko ngāi Māori tonu kei ngā taumata o ngā tatauranga, na te whakamā tonu pea te take.”

Otira, ko te rongoa pea, me timata moata mai ngā tohutohu ki a tātou mokopuna, me pēhea te tiaki tika i o ratou niho, i te wā e nohinohi tonu ana.