E ai ki tētahi pūrongo ko te whakatū whare ki runga whenua Māori he pūnaha kua pokea

Kia kōtahi te rōpū hei pūtahi whakapā mā te Māori e hiahia ana ki te whakatū whare ki runga i o rātou whenua. Koia nei tētahi o ngā tino whāinga o te pūrongo kua puta i te Tumuaki o te Mana Arotake o Aotearoa mō te whakatū whare ki runga whenua Māori, i te kitenga atu, ko te whakatū whare ki runga whenua māori, he pūnaha kua pokea.
 

He uaua mā te Māori te whakatū kainga ki runga whenua matarau, heoi ko te manako ia kei te huri ngā taero a kupe. 

Hei tā James Swindells, “Ko tā mātou he ara māherehere tēnei engari kei te aro rātou ki o mātou tūtohinga.”

Ki te pūrongo i puta i te tari o Te Mana Arotake o Aotearoa inapō mō ngā ara tautoko i te whakatu whare ki runga whenua Māori, i mea ake ngā tūtokinga me pai ake ngā whakawhitiwhiti kōrero ki waenga i ngā ratonga me te Māori.

Ko Swindells tērā e mea ana, "Kei te mōhio mātou he nui tonu ngā rōpū kei roto, kei a rātou te tikanga ki te kawe i a rātou ki ngā rohe, i te mea kei ia rohe tōna mahi me ōna uauatanga."

E rua ngā kaupapa i arotakehia i roto i tēnei pūrongo, ko ngā pūtea taurewa mo ngā kāinga whenua me te pūtea hourua whakakite Māori.  Ko te ngako o ia kaupapa hei rapu pūtea mo te Māori hei whakatū whare ki runga i o rātou whenua, heoi i reira ngā hapa.

Ki tā Swindells, "He nui tonu ngā whakatika kua puta e pā ana ki ngā pūtea taurewa. He nui tonu te Māori e hiahia ana ki te whakatū whare, he nui hoki ngā whakatika ki runga i ngāa pūtea taurewa mo ngā kāinga whenua kua māmā ngā ara e tūwhera ki te katoa."

Kei te tautoko a Te Ururoa Flavell, Minita Whanake Māori i te pūrongo.  Hei tāna ko te mahi nui a te pūrongo e kitea ana te anga whakamua o ngā mahi whakatū ki runga i ngā whenua matarau Māori.  

E haere tonu ana ngā mahi ki te whakaea i ngā māharahara ki roto i te pūrongo me tāna mahi ki te whakamāmā i ngā ara mā te Māori ki te whakatū kainga ki runga i o rātou whenua.