E āki nei a Tā Toby Curtis kia tere rongo tōna kereme

E tono nei a Tā Toby Curtis mātanga mātauranga kia tere te ū o te kereme Wai 2770 ki mua i te rōpū whakamana i te Tiriti o Waitangi. E hāngai ana te kereme ki te whakakorehanga o ngā kura hōurua. Ko tā Toby e mea ana, he whakaaro takitahi tō te Minita Mātauranga. “Kia tere wā rātou mahi, kia puta mai wa rātou kōrero, i mua i te mahi a te Minita ki te kati i ēnei kura”. Kua tono ngā kura hōurua kia ū ki raro i ngā mārautanga mātauranga. Engāri ki Tā Toby, taihoa. “Kei te hē tērā hiahia, me kati wēnei kura, i mua i te haerehanga ki wēnei kura, kāre rātou i te hiahia ki te haere ki te kura i te mea i pōhēhē rātou karekau wō rātou take”. Tekau mā tahi ngā kura hōurua i whakatūhia ki Aotearoa. Nō te Hui Tangarū i tango te wāhanga i pā ana ki ngā kura hōurua ki roto i te ture mātauranga. “Kua noho wahangū wā tātau mema o te whareparemata, he maha wā tātau mema kei reira, mema Māori, ana kātahi anō tātau ka kite nuinga o ngā Minita Māori i roto i tēnei kāwanatanga. Kāre tētahi kupu e puta mai i a rātou ki te tautoko i wēnei”. E ai ki Te Rōpū Whakamana i te Tiriti o Waitangi, kāre anō kia tau te rā, kia rongohia te kereme ki mua i a rātou.