E anga whakamua ana te Pāti Māori hei whakanui i tōna huritau tekau

Mārakerake ana te kitea kua whakaohoohotia te Pāti Māori i ana kaitono hōu, ā, i a rātou e whakanui nei i te tekau tau - e ai ki a Te Ururoa Flavell kei te mura tonu te ahi.

Me oke ururoa ka tika, karekau i tapainatia ko te ana o ngā raiona mō te koretake noa iho nei.  Nā whai anō te pātai ki te pakeke o ngā kaitono, pena e rite ana ia mo tēnā?   

Hei tā Tunuiarangi Mclean, “Kāre au i te māharahara tā te mea pēnā kua reri mai ko rātou kē mōku, tōku tā moko ka kuhu atu koira te taniwha nui.”

I ngā mema taketake a Pita Sharples rāua ko Tariana Turia e ritaia ana, he wā nui tēnei mō te Pāti Māori ki te whakapakari anō i a ia.

Ka mutu, e mōhio ana ngā kaitono ko te whakamārama ki ngā kaipōti mō te noho tahi me te kāwanatanga tētahi mahi mā rātou.           

Ko te whakapiki i te pae taketake mō ngā utunga kaimahi kia utunga oranga kē tētahi o ana kaupapa here, ara kia tekau mā waru tāra, waru tekau hēneti.

Āpiti atu he whakawhanui i te hauora kore utu ki ngā tamariki i raro iho i te tekau mā waru tau, me te whai kia kore utu ngā waka tumatawhānui ki te hunga rawakore, ngā tamariki, me ngā tauira.

Āe marika i te Pāti Māori e pupuhi nei i ngā kānara ki ōna tekau tau kua hori, kotahi noa te manako e wawatatia nei - kia rongo i te reka o wikitōria hei te rua tekau o Hepetema.