E aukatihia ana te inu waireka i te karapu hākinakina o Ngāti Whātua

E aukatihia ana te inu waireka i te karapu hākinakina o Ngāti Whātua.

He tū tēnei nā te iwi mana whenua nei o Tāmaki whai muri i te putanga o tētahi pūrongo e mea ana, e rua o ngā tāngata e toru katoa i Tāmaki Makaurau kei te pākia e te mate mōmona.

Kei te whakatōhia nga kōwhiringa hauora pai ki roto i nga tamariki o te karapu hakinakina o Ōrākei Volcanoes.

Ko te hiahia a te karapu kia kaua e kite he inu waireka ki te tepu.

E ai ki a Te Arohanui Hawke, "Ko te mahi māmā kua whakatō kē ki roto i o mātou ture, ko te mahi uaua kei tua, ki te whakaako anō i a mātou te hunga pakeke, te hunga kai huka me kī. Ko te whakaaro me whakatō ki roto i ngā manawa o ngā tamariki."

E ai ki ngā tatauranga o te pūrongo Healthy Auckland Together, kotahi o ia rima tamariki Māori, ā, tata ki te haurua hoki o te iwi Māori e pāngia e te mate mōmona. Ko te whai o te hāpori ko te panoni i aua tatauranga.

Hei tā Papa Nahi, "Ko te tūmanako o te rīpoata nei kia heke haere ngā tatauranga mate mōmona mō Ngāi Māori, mō te katoa o ngā tangata ki Tāmaki Mākaurau nei, kia whakahāngai ngā tikanga kai ora, inu ora i roto i ngā hapori.”

Mō ngā tamariki o Ōrākei Volcanoes, ko te inu rangatira kei ngā ngutu ko te wai Māori.