E kimihia ana te hunga whakareo i te whitiata, ko Te Kīngi Raiona nā Disney ki te reo Māori

Piripi Taylor

The Lion King. Whakaahua: Walt Disney Animation Studios.

Kua tīmata ki te kimi i te hunga whakareo Māori i te whitiata rongonui nā Walt Disney Animation Studios, ko Te Kīngi Raiona, i te whakapuakitanga mai a te kamupene Matewa Media i te rā nei, ko te huringa tuatahi o ngā whakamātautau e puare ana.

Nā te kaihanga kiriata whiringa Oscar®, nā Chelsea Winstanley (Merata, Jo Jo Rabbit) rāua ko Tweedie Waititi (Moana Reo Māori, Rūrangi) nō Matewa Media te whakapuakitanga i te Hōngongoi, kua tīmata ngā whakaritenga ki te hanga i ngā rerenga reo Māori o ngā whitiata pakiwaituhi toa Academy, o The Lion King, o Frozen anō hoki. Ka whai tēnei i te angitu o tā rātou mahi tahi ki a Disney i te tau 2017, i hua ake ai te whitiata reo Māori o Moana ki ngā whare pikitia i Aotearoa, i Ahitereiria, ki Disney+ anō hoki (2020).

Ko ngā mita ā iwi ka whakanuia i te whitiata, ka rangona i tēnā reo puaki, i tēnā reo puaki.

Ko te mita o Tainui ka puta i a Simba, i a Mufasa, otirā i ngā raiona katoa o Toka Whakahī, hei tohu whakamānawa ki te Kiingitanga. Ko Timon rāua ko Pumba ka ahu mai i Te Taitokerau, ko Rafiki nō Ngāi Tūhoe, ko Zazu nō Taranaki, ā, ko nga hāīna ka ahu mai i a Ngāti Kahungunu.

“You don’t have to be from any particular rohe to audition, just like Moana Reo Māori we encourage everyone to have a go, Karawhiua!” te kī a Winstanley. Engari, arā tonu te whakahau a Waititi, “you will be expected to pull it off nō reira kia kaha rā! Ko te mea nui ka ngākau nui koe ki te reo Māori.” Ko ngā taumata katoa mō te mātau ki te reo e pōhiritia ana. 

Ko te tuatahi o ngā whiringa whakamātautau mā te ipurangi, ka rerekē te whakamātautau mā tēnā reo puaki, mā tēnā reo whakaari. 

He rite ki te whitiata o Moana Reo Māori, ka mahi ngātahi a Winstanley rāua ko Waititi ki a Rachel House (Moana, Hunt for the Wilderpeople, Thor: Ragnarok, Soul) hei Ringatohu Whakaari, ki a Rob Ruha hoki (Moana Reo Māori), hei Ringatohu Puoro.

Ka whakarewaina Te Kīngi Raiona Reo Māori i Aotearoa, i Ahitereiria hoki hei te Pipiri 2022, hei te aranga o Matariki - te tau hōu Māori. 

Ko ngā kōrero mō te whakamātautau kei www.matewamedia.nz. Ka kapi te wā tuku whakamātautau hei te 5pm ā te Rātapu, 17 o Hakihea, 2021.