E kōkiri ana te Tarahiti Kerēme o Tūwharetoa i tētahi arotakenga hei whakatewhatewha i ngā whakapaunga pūtea a te tarahiti.
Nō te hainatanga o tā rātou kerēme tiriti i te tau rua mano mā waru, he ono tekau mā ono miriona tāra te wāriu.
E ono tau kua pahure, ā, he tekau mā ono miriona tāra noa e toe ana.
Ko te whakataunga kerēme ngahere o Tūwharetoa tētahi o ngā kerēme nui rawa atu o te motu i te tau rua mano mā waru, engari ināianei e ai ki te tumu hou o te tarahiti, ki a Temuera Hall, arā ētahi pūtea kua ngaro atu.
E ai ki a Temuera, i ohaoha rawa te tarahiti me tā rātou tuku pūtea tautoko ki ngā kaupapa ā-iwi, ā-hapū anō, ā, he pūtea hoki i ngaro i ētahi kaupapa whakangao huakore.
Hei tāna, kāore te tarahiti i mārama pū ki te nui o ngā pūtea i te whakapaua atu.
Ko te kamupene rōia o Minter Ellison e whakahaere ana i te arotakenga, ā ko tā Temuera e hiahia nei kia mārama ai te kitenga o ngā hua.
Kua karangahia he hui ā-iwi e ngā rangatira o Tūwharetoa mō te mutunga o te marama e tū mai nei kia whakawhitiwhiti kōrero ai mō ngā hua o te arotakenga.
