E māharahara ana te rōpū Kaitoko Whānau i te poronga o tā rātou kirimana mahi

E māharahara ana ētahi kaimahi whakahiato ora o te rōpū Kaitoko Whānau i te poronga o tā rātou kirimana mahi.

E ai ki te Minita Whanaketanga Māori, ki a Te Ururoa Flavell, he kirimana tēnei i kōkirihia i te tau rua mano tekau, ā, ka whakatōroatia ki te marama o Haratua i tēnei tau.  Ka mutu, ka kore e whakahōutia.

I whakatūria e ētahi kaimahi Kaitoko Whānau o roto o Tāmaki Makaurau i tētahi hui ki Ngā Whare Wātea marae i Tāmaki, me te maharahara nui, ka whai pānga pēhea nei te kapinga o ō rātou kirimana e utuhia ana e Te Puni Kōkiri ki ō rātou mahi me ngā whānau.

Ko ēnei tonu ngā whānau, e pēhi nei i ngā raruraru o te whakapōauau, waipiro, kāinga kore, ko te rangatahi e hara ana, tēnei mea te whakamomori, take a whare, take kēnge ara noa atu, ara noa atu. 

E ai ki a Karanga Mitchell, ka whai pānga nui te whakatau kia mutu tana kirimana me ngā kirimana Kaitoko whānau puta noa i te motu, ki ngā whānau Māori.

E ai ki a Karanga Mitchell, "Ka tino pōuri, ka rawa kore, ka ngaro ngā mahara, ka tika ka haere noho ki runga i te mata o te whenua kaare he whakamutunga tika mō rātou, kāre he tangata hei ārahi i a rātou."

Tā Mitchell, e rima tau a ia e mahi ana mō te koni i te kotahi rau whānau, i raro i te kirimana Kaitoko Whānau ki ngā whakamaru o Manurewa Marae, 

Hei tā Karanga Mitchell, "Whitu tekau, ia tau mō mātou katoa e ono mātou e mahi ana - engari tekau mā rima mā tēnā, tekau mā rima mā tēnā, rua tekau mā tērā, rua tekau mā tērā."

E ai ki a Te Ururoa Flavell, "Ka wani kē te mahi a ngā kaitoko whānau, he ōrite ki te hunga e whai ana i te huarahi o te Whānau Ora, arā ko ngā Navigators, i ngā whakatau kua puta mō ngā kaitoko whānau i puta i mua i a au i te wā o te Minita o mua i puta te whakatau kia mutu rā anō ā rātou mahi i ngā tau kua hipa, ā, nā te ngākaunui o te Minita i tērā wā whakarahi ake, ka whakatōroahia te kirimana kia roa ake, ā, i mōhio tonu atu ā rātou katoa ka katia ngā kirimana hei tēnei tau."

E ai ki Te Puni Kokiri, he kaimahi motuhake ngā kaimahi Kaitoko Whānau, he kaitautoko i ngā whānau whakaraerae.

Ki tā Flavell, "Ko te Budget, ko te tahua pūtea, ā, ka puta a te marama e tū mai nei me te whakaaro ake hei tēnei wā kia noho kohatu nei te āhuatanga o Te Whānau Ora mō te ao Māori, ā, ka mutu kia tāpirihia mai ai ngā mea Kaitoko Whānau i raro anō hoki i te korowai o te Whānau Ora."

Iaianei nā, i tō rātou hiahia kia mau tonu ki ō rātou kirimana e anga mua ana ngā kaitoko whānau nei ki te whakarite i tētahi hui me Te Ururoa.