E mānukanuka ana ētahi kaumātua o Waikato i te korenga ō rātou e āhei ki te hoko i ngā whare hōu o KiwiBuild ka whakatūria ki Te Kauwhata. E ai ki a rātou he maha ngā Māori e kore e whai hua i tēnei kaupapa hanga whare ngāwari te utu a te kāwanatanga.
Ko te kupu a Minita Twyford mō ngā kāinga o KiwiBuild kāore i te rata ki ngā taringa o te haukāinga nei.
“Ngā mea e rangatira ana ka taea e rātou, ngā mea e nui ngā mahi, nō reira e taea e rātou,” i mea atu a Pat Kingi nō Ngāti Naho, Ngāti Pou, Ngāti Whāwhākia.
“E kore taea e tāua pēnei a tāua nei. Kāore taea nā te nui o te utu,” i mea atu ia.
“Tūturu ana, tē taea te kite e tātou iwi e hoko whare ana,” i kī atu te hemana o te marae o Waikare a Robert Tukiri.
Kotahi mano e ono rau ngā whare hōu ka hangaia ki Lakeside, kotahi rau e whitu tekau mā rimā kua tohua mō KiwiBuild, nā te wero nā Tukiri i takato i te marama o Hurae ki te aroaro o te Minita.
Ka hoko ngā kāinga tekau e rua ngōna ruma moe me ngā kāinga atu e toru tekau mā iwa, mā te pouaka pōti ā tērā wiki, e whā rau e waru tekau mano tāra te utu.
“E hāngai pū ana te kaupapa o KiwiBuild ki te hunga kaiwhiwhi utu kei te pae waenganui. Kāore e taea tō tātou iwi e putu ana ki raro,” i kī atu a Tukiri.
Wheoi, e māharahara ana te haukāinga i te nui o te utu o ngēnei kāinga me wero nui hoki mā rātou ki te hoko ki konei.
“Ko te hiahia nōku kia kite i te haukāinga e hoki mai ana ki te wā kāinga noho ai,” te korero a Tukiri.
E ai ki a Twyford kei te whakarite te kāwanatanga i tētehi kaupapa utu mōkete hei tautoko i ngā whānau Māori tē taea te tutuki i ngā paearu, wheoi, ka kite rātou i ngā hua hei ngā tau e haere ake nei.
