Ki te riu o Waikato, e noho mānukanuka ana ētahi o ngā mātātahi i ngā kōhurutanga whai pānga ki ngā kēnge i te rohe. Hei tā kaihāpai i te hunga rangatahi hei tā Eugene Davis me poipoi ngā haproi i a ngāi taiohi kia kore ai rātou e kuhu ki ngā mahi kēnge.
Hei tā te kaiaarahi o Te Ahurei a Rangatahi, Kia tū pakari ai te hunga rangatahi i roto i tēnei ao te kaupapa ārahi i a rātou.
“Mai i te tīmatatanga ko wai koe, nō hea koe,” i kī atu a Davis.
“Koirā te tino take ki a mātou kia taea te hunga rangatahi kia tū kaha haere i runga i ā rātou ake mana, i runga i ā rātou ake tūrangawaewae ahakoa te aha.”
E whakatewhatewha ana ngā pirihimana i te kōhurutanga o Wayne Noda nō Rāhui Pōkeka, Robert Nelson nō Kirikiriroa, me Mitchell Paterson nō Ngāruawāhia i tēnei marama. Hei tā nga pirihimana he matenga whai pānga ki nga mahi kēnge.
“Ki a mātou hoki ngā rangatahi, he āhua mataku i roto i ngā hapori o Kirikiriroa i a rātou e haere mā runga i te rori. Tērā hoki, tūpato haere rātou e rongo ana ēnei āhuatanga,” i mea atu a Davis.
Ko te kupu whakatūpato a ngā pirihimana me whakarere ko ngā mahi kēnge.
“Pēhea te whāinga pai ake mā rātou?” i pātai atu a Davis.
“Ko mātou ngā tuākana whakaarahia rātou. Engari mai i te tīmatatanga o te rā, kei ā rātou tā rātou moemoeā, kei a rātou tā rātou hiahia.”
Hei tā Davis me tautoko ngā tuākana i ngā hapori katoa i te hunga rangatahi kia tutuki ai ō rātou tōmina me ngā whakaaro.
