E mea ana tētahi patunga o Whaleoil me heke te Pirimia i tana tūranga

Me rihaina a John Key i tana tūranga Pirimia, me tū rānei ki te aroaro o tētahi komiti arotake. He karanga tēnei ao ake i te whakapuakanga o te ripoata a Te Pā Whakamarumaru o Aotearoa i tēnei wiki, e mea ana i whai wāhi nui te tari o te Pirimia ki ngā mahi tātā a te kaituhi ipurangi, a Cameron Slater, ki te kaiārahi o te Rōpū Reipa i taua wā, ki a Phil Goff.

He parurenga o mua a Shane Bradbrook o te kaituhi ipurangi rā, e mōhiotia nei ko WhaleOil, me ana mahi aukati tupeka mo te rōpu Te Reo Marama.

Me kī i huri aua mahi a te tari o te Pirimia ki te ngau i te kotore o John Key i tēnei wiki.

Heoi, ahakoa tēnā, e kore te Pirimia mo te hoki whiore hume atu, engari e ūpoko māro kē ana. Nā whai anō rā e ai ki a Shane Bradbrook me taka te toki.

E mōhio ana a Shane Brabrook ki ngā mahi whakaweti a Cameron Slater. I kaha tātāngia a Bradbrook me tana rōpu Māori aukati tupeka i te whārangi ipurangi, a WhaleOil.  

Neke atu i te tekau tau te rōpu a Shane Bradbrook mā e whakahaeretia ana, ka kapi katoa nā ngā tini wero i te whārangi ipurangi WhaleOil. Nō reira te hōhā ki tā te Pirimia karo i ngā mahi hāpai o tana tari i nga tātā a Cameron Slater ki a Phil Goff.   

Tūturu pērā tonu ki tana kapa makau, ki te Kapa Ōpango, kua karo, kua tanuku hoki te Pirimia i te roanga atu o te wiki. Mātua rā mōna i kōrero he nei mo te pātuhi i a Cameron Slater i te pō o mua i te whakapuakanga o te rīpoata mō te take ki a Phil Goff.

Kāti hei tērā wiki hoki ai ngā mema pāremata ki te ana o ngā raiona, ā, te āhua nei he hākari anō te kai mā te āpitihana.