E ngākau rorotu ana te mahuri tōtara nō Piopio a Katherine Coffin mō tōna tau tākaro tuatahi me te kapa Northern Mystics i te tauwhāinga ANZ. Hei te marama o Poutūterangi tīmata ai te tauwhāinga Tāhimana ki te tira Tactix i Ōtautahi.
Ka piki atu a Katherine Coffin ki taumata matua o te whakataetae.
E ai ki ētehi he mātanga a Katherine ki te tūranga maru paehau. Kua hono mai ia i te tira Magic, i reira rā ia e whakahiato ana.
I uru atu a Katherine ki te tūranga kua mahue i a Anna Harrison, nona noa nei ka whakatau ake, e hapū ana ia me tana tamaiti tuarua, nāreira ka heke iho ia mō te kotahi tau.
Hei te Huitanguru ki Poihākena tū ai he tauwhāinga parawhakawai o te "The Summer Shootout". Ka whai wāhi a Katherine ki te whakaatu i tōna māia hei kitenga mā te kaiako a Debbie Fuller, rāua ko te kaiako tuarua a Noeline Taurua.
Kātahi anō a Katherine i hunuku ki Tāmaki Makarau ki te noho tahi me tōna whaea kēkē, te Rarauhe hiriwa o mua a Jenny-May Coffin.
