E ngākaunui ana te marea ki te kiriata Dark Horse

Ki Tūranganui a Kiwa inapō, i whakaaturia tuatahitia te kiriata hou The Dark Horse, tērā e kitea ai ngā pūkenga whakaari o ngā toki Māori pēnei i a Cliff Curtis rāua ko James Rolleston.

Huhua ana ngā whetū i te whakaaturanga tuatahi inapō, ā he kaupapa kāmehameha tēnei ki te hapori whānui.

E pā ana te kiriata ki te kōrero pono mō tētahi tangata, ko Genesis Potini te ingoa.  I pākia ia e te mate hinengaro, heoi mā tana aroha ki te kēmu whakarau kīngi me ngā āhuatanga Māori i poipoi ia i te hunga rangatahi o Turanga nui a Kiwa i noho whakaraerae.

Hei tā Cliff Curtis, “He tino hōnore nei ki te whakahoki atu ki konei ki Te Tairāwhiti, ki te tautoko i te kōrero nei e pā ana ki te tangata a Genesis Potini, me tana whānau whānui katoa, ki tēnei kōrere te kiriata nei.”

Hei tā Natalie Potini, “Pupū ana ngā kare-ā-roto i te kiriata, ā, he uaua ki a au te whakawehe i a Cliff Curtis me tōku hoa rangatira, me Genesis Potini, heoi, ka roa ake au e mātaki ana i te kriata, ka rata pai atu anō au.”