Hei te Rāhoroi nei tuki ai a Counties-Manukau Steelers ki ngā Wellington Lions i te whakataetae Mitre 10 Cup. E tākaro ana ngā kapa e rua mō te tāonga whakamahara ki a Jonah Lomu, te parirau rongonui i tākaro mō ngā kapa e rua nei.
Kua tōtika anō te waka o Counties Manukau i te whakataetae Mitre 10 Cup. E toru ngā hinga karapīpiti hei timata i te whatinga nei, a kua rua ōna wikitōria karapīpiti i ngā wiki tata nei. Hei tēnei wiki ka tuki rātou ki ngā waewae tapu o te taumata teitei o te whakataetae, ki ngā Wellington Lions. Hei tā te kāpene kairīwhi, hei tā Matiaha Martin he kapa kaha ki te oma ngā kapa e rua, heoi "ko te mea kia mātou kia kaha tō mātou me kīi forward pack ki te pakanga atu ki tō rātou. Koina te wehenga."
Koinei te tukinga tuarua mō te taonga whakamahara kia Jonah Lomu. Kei ngā ringa o Wellington i tēnei wā. Nā te whana hāmene 48m a Jackson Garden-Bachop i angitu ai a Wellington i te tau 2016, 28-27. Heoi ka mate ururoa ngā Steelers kia whakahoki mai te taonga ki te kainga. Hei tā Martin anō, "kia mātou nō Counties a Jonah Lomu, nō mātou kē taua tāonga."
E ai ki te kaikape, ki a Joe Royal ko te ngako ō ngā kōrero katoa o te kapa i mua i te whakangungu i hāngai pū ki ngā mahi o Lomu nōna i te ora. Ka mutu kua roa te taonga e noho ana ki Te Upoko o te Ika, kua tae te wā kia hoki ki te kāinga.
Ko Jim Coe tētahi tuahangata ō mua nō Counties-Manukau, 182 ōna tākaro mō Counties-manukau. Ko ia hoki tētahi e kaha mōhio ki te mana o Lomu. E mahara pū ana te uri o Pikiao ki te wā i kaupare a Lomu i a Tana Umaga, me ōna hoatākaro e whā i Athletic Park, ka piro i te kokonga o te whīra.
He piro kua kaha mātakina e te kapa o te naianei e ai ki a Royal. E taunu ana te kapa i a Toni Pulu me Tavita Nabura kia tukuruahia i taua piro hei tēnei taha.
Ka mau poraka motuhake te kapa Steelers mō tēnei wiki, ka hokona atu hei mahi kohi pūtea mō te Whare Hau Kiore ō Franklin, mō te wahanga whutupōro rangtahi o Counties-Manukau anō hoki.
Hei te 2.05pm timata ai te kēmu nei, hei te 11.35am timata ai te kēmu wāhine o ngā Counties-Manukau Heat ki ngā hoa tata, ki a Auckland Storm i te whakataetae Farah Palmer Cup.
$11 te utu mō ngā tīkiti ki Pukekohe, he whakamana anō i te hautīpua rā, i a Jonah Lomu.
