E ngana ana tētahi kaiwhakahau kia whakapakari ake i te noho a ngā whānau Māori

E ai ki a Herewini Jones, mātanga kaiwhakaora whānau, kei a tātau anō ngā whakautu hei whakatika i ngā raruraru kei roto i ō tātau whānau, e puta ai tātau ki te whai ao, ki te ao mārama.

Koinei ētahi o ngā tirohanga i whārikihia ki ngā kaimahi e mahi ana ki roto i ngā hapori ki te tauawhi i ngā whānau kia kite i te orangatonutanga. 

He whakahuinga tēnei e hāngai pū ana ki te tauawhi i ngā whānau Māori, e raru ana i ngā kaupapa kēne, tarutaru me te waipiro. 

E mōhiotia whānuitia ana a Herewini Jones mō āna mahi i te taha o ngā iwi taketake o te ao. I tēnei rā kei Tauranga moana ia e kauhau ana ki ngā kaimahi toko i te ora. 

E mōhio ana tātau ko te Māori tērā e tino karawhiua ana ki roto i ngā tatauranga mō te hauora, ture, me te mātauranga.  Engari, e aha ana tātau ki te takahuri i ngā aupēhitanga?

Ko ngā tauira, pēnei i te pā harakeke e tino whakamahia ana hei āwhina i ngā whānau Māori, engari, āhea taea ai e te whanau te āwhina i a rātou anō. 

Mō te nuinga o ēnei kaimahi, kua mahi rātou i te taha o te hunga rangatahi me ngā whānau.

Ko te whānuitanga o te kaupapa, kia rite anō aua whānau ki te takahuri i a rātou anō, kia wetekina ai nga taumahatanga, kia tū mai ai te tangata ki te kawe i te manuka.