Ko tā Te Manatū Hauora, ko te mate huka te take hauora mātāmua ki Aotearoa nei. Ko te marama mate huka tēnei, ā, kei te ūpoko pakaru Tākuta Lily Fraser kia huri ngā whakaaro a te iwi Māori e pā ana ki te kai hei rongoā i tēnei mate whakangoikorere.
E pā ana ki te mate huka, ko tā Tākuta Lily Fraser, kia iti ake, kia whakaoti atu rānei te kai i ngā warowaihā.
"Nō te mea koira te kai ka huri ki te huka mēnā ka kai koe i tērā kai, ka kuhu atu ki tō toto kātahi ka huri ki te huka."
Āpiti atu, kei te akiaki a ia kia kaha ki te kai i ngā hinu me tana whakapono i mōhio ngā tīpuna ki ngā hua o te hinu.
"Ko te Kererū tētahi o ngā tino kai o ngā Māori, kei te pērā hoki mō ngā tītī ko te hinu."
He tākuta, he kaitohutohu a Lily Fraser ki Turuki ki Māngere. Ko ia te tauira Kura Kaupapa Māori tuatahi i puta i te kura tākuta. Hei tāna he maha ngā tauritenga o tēnei momo kai ki ngā kai ō mua ā te Māori.
"Ko te pūmua tētahi, ngā mīti, ngā hēki, te ika, ko tērā atu taha ko te hinu, arā, te hinu nō te oriwia me ērā mea hoki. Ko te kīnkai ko ngā huawhenua."
Ko tāna, kei te kitea ngā hua i waenganui i āna tūroro.
"Kua mutu wā rātau rongoā, kua mutu te wero i te insulin, kau heke te taumaha, kei te tino ora rātau ināianei, kei te harikoa, kei te korikori tinana, kei te mahi tahi me te whānau."
Ko te 14 o Noema te Rā Mate Huka ā Ao. Kei te whakaohooho a Diabetes NZ i te marea ki ngā tohumate o te mate huka, ngā momo rautaki hei ārai i a ia ka mutu, ngā huarahi hei whakamāmā i tēnei mate.
