E pāpārangi ana ngā tangi apakura mō Toni Waho i mate ohorere atu inapō

E pāpārangi ana ngā tangi apakura mō te pou reo Māori, mātauranga Māori anō hoki, mō Toni Waho i mate ohorere atu inapō.

Ko te reo Māori te tūāpapa o ngā mahi a te uri o Ngāti Rangi, o Te Ati Haunui a Pāpārangi, Ngāti Apa, Kahungunu, Waikato i roto i ngā tau maha, i raro i ngā whakaruruhau o te Kōhanga Reo, Kura Kaupapa Māori anō hoki.

He toa tauā o Te Aho Matua, o te reo Māori, otirā o Ngāti Rangi, Tere ki te Muri. 

Nō te iwa karaka o te pō rā ngā pirihimana ka waeahia atu, whai muri i te takanga o Papa Toni ki te awa i Tangiwai, pātata atu ki Ōhākune nōna e whakahīkoi kurī ana. 
Nō mua tata i te tekau mā tahi karaka i te pō, ka kitea tōna tūpāpaku. 

I hau te rongo o Papa Toni mōna i whakamahiti korou ai mō te reo Māori, mō ngā kōhanga reo, mō ngā kura kaupapa Māori Aho Matua anō hoki. 

Nāna ngā kura kaupapa Māori tuatahi o Manawatū, o Mana Tamariki anō hoki i whakatū, he kore nō te rāngai auraki i whāngai tika i te tamaiti Māori.  

He pīkoko i ruia hoki ki ngā uri o Ngāti Rangi, ā-reo nei, ā-kokoraho tiriti anō hoki.

Ahakoa ngā raru o ngā tau tata nei. Hei tā Che Wilson, ka maharatia te pūmau o Papa Toni ki te kaupapa.

Hai te ata āpōpō haria atu ai te tūpāpaku o Papa Toni ki Te Papaioea, ki reira tirotirohia ai e te korona. 

E āta whakatauria tonutia ana ngā whakaritenga ā-muri ake. 

Kauria atu rā e te rangatira motuhenga, nga wai i hoea mai ai e ō mātua tūpuna. 

Waiho mai āu tamariki tokorua me ō tini uri, hai maimoatanga mā te iti, mā te rahi, otirā mā te ope tauā o Te Aho Matua.