E pōhiri ana ngā Tāroaroa Pango i a Webster

James Perry

Kua oti ngā whakaharatau whakamutunga mō te whiringa whakauru ki te whakataetae o te Ao Poitūkohu ka tū ki Rotorua. Hei ā kō kō ake nei timata ai te tukinga o ngā Tāroaroa Pango ki a Reponona. Kua whakangako anō a Aotearoa i te urunga o te ringa rehe, o Corey Webster. 

Nāna anō te kī kāore ia e wātea mō ngā tākaro e rua nei, heoi kua hoki tonu atu a Webster ki te kapa Tāroaroa Pango mō te tukinga ki a Reponona hei te pō nei. E hurō ana a Paul Henare. Hei tā Henare, ko Webster tētahi Tāroaroa Pango tūturu nei, kāore ia i te tino rata ki te noho ki ngā tahataha, mātaki atu. Ko Ethan Rusbatch tērā ka heke ki raro mō te pō nei.

Kāore a Webster i haere ki Reponona mō te tukinga ki a Hīria. Hei tā Henare, i paku kōrero rātou kia hoki tika atu ki te kapa, engari kāore i tino mana te kōrero. Ahakoa kāore rātou i paku raru i tōna ngarohanga, kua kaha anō rātou i tōna hokinga atu mō te tukinga taioreore nei ki a Reponona. Hei tā Henare, kua roa a Webster e noho ana hei kaitākaro mō te kapa, nā reira kua waimarie rātou kua hau anō ai ōna wheakoranga.

Nō tōna hokinga ki te kapa, kua tūhono anō a Corey ki tōna taina, kia Tai mō te wā tuatahi i tētahi wā roa. Hei tā Tai, e hikaka ana ia ki te tākaro ki te taha ō tōna tuakanam e poho kererū anō ai ō rāua mātua.

Kua rua wiki te kapa nei e karapoti nei i te rohe o Āhia, e hikaka ana te kapa ki te tākaro ki te kainga ki Energy Events Centre i Rotorua. 

I tū atu i tērā, nā runga i ngā ture o FIBA e rua mineti noa e āhei ana ki ia kapa mō ngā whakaritenga i mua i te kēmu, nā whai anō kua whakarite e ngā Tāroaroa Pango kia waiata i te wahanga Māori anake o te motu, e āhei tonu ai rātou ki te haka. Hei tā te tāhuhu rangapu o Poitūkohu Aoteroa, hei tā Iain Potter kāore rātou i paku whai whakaaro ki te whakakore i te haka, heoi whakaaro ana rātou kia whakawhiti i ngā waiata e rua ā ngā kēmu e haere ake nei, ā inā whai wā ana, ka waiata anō i ngā waiata e rua.

Hei tā Potter anō, nō te otinga o Te Wiki o Te Māori inanahi nei rātou i whai whakaaro ki te waiata Reo Māori.

Hei te 7pm o te pō nei tīmata ai te kēmu, kei a Whakaata Māori te pāohotanga mataora.