Ko Arihiana Marino-Tauhinu tētahi o ngā Ika Puku tokowhitu o te kapa Mamaku i whakaingoatia i tēnei wiki. Ehara i te mea he tauhou rawa a ia ki te kapa, heoi kāore anō ia kia mau tūturu nei i te poraka.
E tata ana a Marino-Tauhinu ki tōna pae tawhiti, "he wā roa āhau e moemoea ana i tōku hokinga atu ki te kapa, nō reira āe, koa ana te ngākau."
Nō ngā tau 2015, 2017 anō hoki whai wāhi ia ki te kapa Mamaku. Nō tōna korenga i ngā aro ā kapa kua rite tonu tōna whakapakari i a ia anō e rata anō ai ngā kaiwhakahaere ki a ia mō te whakataetae Super Series hei tēnei tau.
"Kia tere ake ki te whiu i te pāoro, wērā mea. Engari ki āhau nei ko te mea e rata pai ana, ko te koi o te ārero, eh!"
Ki te whai wāhi te "ārero koi" nei nō Counties-Manukau ki te whīra mā Ngā Mamaku, ka tūhono pea ia ki tētahi atu ārero Māori o te kapa, arā ki ā Ruahei Demant. He mea whakakipakipa i te uri o Ngāi Tahuhu, Ngāpuhi me Te Rarawa, "rere pai te reo i te whīra," tāna ki a Te Ao Māori, "he mea whakahirahira inā ka tae maua tahi ko Ruahei ki runga i te whīra, ka tāea ki te kōrero i te reo Māori."
Nō tēnei tau riro ai e Marino-Tauhinu i tētahi kirimana whutupōro, heoi he kaimahi ia i te Haikura o Papakura, ki reira whakaawe ai i ngā rangatahi o taua hāpori. I whakanui te kura i ā ia itainahi nei, ā hei Marino-Tauhinu mā tōna okea ururoa nei ngā tauira e whakaawe ā hāere ake nei, "ka tū ahau mō te tamaiti Māori, kia tāea e rātou te kite he whāinga ka tāea e rātou te eke angitu i tēnei ao."
Hei tērā wiki tōpū atu anō ai a Marino-Tauhinu me te kapa Mamaku ki Tāmaki Makaurau whakarite ai mō te whakataetae Super Series ka timata hei te Pipiri.
