E rere ana ngā wero ki a Raniera Tau kia heke iho ia i ōna tūranga ā-iwi katoa

E rere ana ngā wero ki a Raniera Tau kia heke iho ia i ōna tūranga ā-iwi katoa mō Ngāpuhi, kaua ko te tūranga heamana o Tūhoronuku anahe.

I tētahi hui motuhake o Tūhoronuku inapō, i heke a Tau i tana tūranga heamana, kia oti rā anō ai ngā mahi tirotiro mō tāna pupuri i ētahi manu kererū.

Pakō te pū a Chris Finlayson, ā, ko Raniera Tau i riro hei kai mā tana ahi.

Kua heke Raniera Tau i tana turanga heamana o Tūhoronuku, engari e noho tonu ana ia hei mema poari. E ai ki te kāwanatanga e kore tēnei take e whakararu i te mana whakatau a Tūhoronuku i te kereme Tiriti o Ngāpuhi.     

Hei tā Te Ururoa Flavell, “Kua mōhio tonu ia kua he koinei ia kua puta i tuku tētahi kupu whakapāha ko taku he ki atu a kua mōhio ia ki te āhua taumaha kua ūhia ki a ia.”

Hēoi, ko tā Reipa he whai i te toto me te karanga kia heke a Raniera Tau i ana tūranga ā-iwi katoa, kaua ko tēnā ki a Tūhoronuku anake.

Ki tā Peeni Henare, “Tēnā pea me heke mai tōku matua a Sonny i ōna tūranga katoa, Te Ohu Kaimoana, te Iwi Leaders Forum, he tini ngā tūranga e whakakīngia ana e tōku matua.”

Ka kore e kapi ki reira. Hei tā rātou anō ko te hanga tōtara wāhirua a Ngāpuhi ki te kereme ka whakamahutia pea, i a Reipa e whakatuaki ana ko Raniera Tau te mate nui.

E ai ki a Henare, “E mea atu ana ko ngā tāngata te take, ehara ko te kaupapa, nōreira kua heke mai tōku matua a Sonny, tēnā pea ka anga whakamua a Ngāpuhi.”

E mea ana a Kelvin Davis, “Ka tatari tātou e aha ana te ture, ka tirohia ngā pirihimana ki tēnei kēhi, mā rātou e whakamana i ngā whakapae ki a ia.”

E tuia tonutia ana ngā ngutu o Raniera Tau, ka mutu, ko te pātai nui pēnā ka hāmenetia ia, kaore rānei.