E rere ana ngā whakanuitanga whai muri i te whakamanatanga o te pire a Ngāi Tūhoe

I whakakao mai tētahi tira ki Tāneatua i te ata nei ki te mātaki me te whakanui i te pānuitanga me te whakamanatanga o te pire o Ngāi Tūhoe me Te Urewera. 

Hei tā Te Hau Tutua, “Ko tēnei rā, he rā mō Tūhoe katoa, mō tātau katoa kua whāia nei te huarahi kia mutu ai ngā raupatu, kia tū ngātahi ai, tātau i te taha o te karauna.”

Nuku atu i te toru tekau mā rua mano te taupori o te iwi, e waru tekau paihēneti o rātou kei waho o Te Urewera e noho ana.  He nui tonu o rātou kaore e mohio ana, he aha rā kei tua, engari arā noa atu ngā tūmanako.

Hei tā Hans Tiakiwai, “Koinei te timatanga o te whakawā a te iwi i a ia anō, te whakawā o te iwi i tana noho ki ētahi atu o ngā iwi, te whakawā o te iwi i tana noho me te karauna, koira au e mea ana, he hīkoi hou tēnei ka hīkoihia e te iwi”

Kua roa kē a Tuhoe e whawhai ana mō to rātou ake Mana Motuhake, a, ko te whakataunga e tohu ana i te whakatinanatanga mai o tērā wawata. 

Hei te wiki e tū mai nei ka tau mai te kaikōmihana pirihimana a Mike Bush ki roto i ngā kainga o Tūhoe kia hohou i te rongo mō ngā hē a ngā pirihimana i urutomo atu ki Te Urewera.