Kua oti katoa ngā whakaritenga o ngā kapa rīki o Aotearoa me Ahitereiria i mua i ngā kēmu mata-toru ki Te Pā o Rarotonga āpōpō.
Nō te rangi whakahaere e te kāpene hou, e Dallin Wātene-Zelezniak i tōna whakaharatau kāpene tuatahi. Hei āpōpō ārahi ai e Wātene-Zelezniak whai muri i tā Michael Maguire tīpako i ā ia kia tū hei kāpene o te kapa. Kāore te uri o Hauraki i te āmaimai i tēnei wā. Hei tāna, ahakoa kua mau e ia te tūranga kāpene, e muia ana te kapa i ngā kaiārahi pēnei ia Jared Waerea-Hargreaves me Jesse Bromwich, e māmā ai tōna kuhunga ki tērā tūranga.
Captains Dallin Wātene-Zelezniak and Boyd Cordner ahead of the clash tomorrow - Photo/ File
I te mātaki ngā ika a-Whiro o te kapa, a Roger Tuivasa-Sheck me Issac Luke i te whakangungu i te rangi nei. E whara ana rāua tahi, na whai anō kua whakaingoa e Maguire i ētahi kaitākaro hou, i ētahi pāhekotanga hou anō hoki. Kua whai wāhi te kaikape Storm, a Brandon Smith ki te aro-ā-kapa, ko te pouwaenganui o te kapa whakaihuwaka, o ngā Roosters, ko Joseph Manu anō tētahi ka kōkuhutia āpōpō. Hei tā Maguire he waimārie nōna kua mōhio kē ngā kaitākaro nei ki a rātou anō. Hei tāna anō, kua roa ngā kaitākaro o Aotearoa e tākaro tahi ana ki ngā kapa ā-rohe o te motu nei mai anō, mai anō.
Ko ngā kapa Punua Kiwi, Kangarū anō hoki ka timatahia i ngā kēmu mata-toru nei, ko ngā wāhine ka whai muri ake, arā ngā Rarauwhe Kiwi ki ngā Jillaroos. Inā ngā kaitākaro kua tipakohia e te kaiako, e Kelvin Wright i whai wāhi ki ngā kapa o Ahitereiria i te whakataetae NRL Wāhine i tēnei tau. Hei tā Honey Hireme, kāpene o te kapa, kāitākaro anō hoki mō te kapa St. George-Illawarra Dragons, kua whai hua te kapa i te noho tahi ki ngā kaitākaro Jillaroos. Hei tāna anō, kua roa rātou e tukituki ana, heoi kāore i tino mōhio ki ā rātou anō, heoi nā te noho tahi kua waia haere ki ngā whakaarotanga o ngā Jillaroos.
Hei te toru karaka o āpōpō tīmata ai ngā tukitukinga o ngā hoariri onamata nei.
