Ko tā Chris Finlayson ki a Te Kāea, inaianei kua ūtaina te taumahatanga ki runga i ngā kai-kerēme. Otirā, ko te mahi a Ngā Kaitiaki Rēti Ngāhere, ko te hāpai i ngā iwi.
Kua puta mai te Minita Take Tiriti me tana whakatakariri atu ki Ngā Kaitiaki Rēti Ngāhere Karauna, kua kapi tāna kēti a pūtea hei kōkiri i ngā kereme tiriti a te iwi o Ngāpuhi
Ko tā Finlayson he rongo tino hōha tērā nā te mea ko te mahi o taua tari ko te tautoko i ngā iwi e whai ana i taua huarahi, heoi i tēnei wā kīhai tēra āhuatanga i puta. Ko tā Pita Tipene o Te Kotahitanga,"e kaha ana tō mātou āwangawanga ngā iwi o Ngāpuhi ki tēnā whakaritenga."
I tūmanakotia, kia timata te wāhanga tuarua mō ngā rongo kerēme tiriti a Te Paparahi o Te Raki, a te marama e heke mai ana, engari kua kōtiti nei te waka.
Ko tā tētahi o ngā roia mo Te Kotahitanga ko Moana Tuwhare nā tēnei āhuatanga kua whakatāroatia, kua whakararu a rātou mahi, inaianei kei te hoki anō rātou ki te whakatika i ngā mahi.
Ko tā Finlayson, he āhuatanga tēnei ka kaha whakararu hoki i te mahi o te Rōpu Whakamana i te Tiriti o Waitangi nā te mea i whakatahangia e taua rōpu ēnei rā mo taua kaupapa heoi, kua whakarerekēhia inaianei.
Nā tetahi kaimahi o roto i Ngā Kaitiaki Rēti Ngāhere Karauna i tuku tono atu ki te Poari kia whai huruhuru ai te kerēme, engari e mea ana Te Kotahitanga o Ngā Hapū, kātahi anō ka tae atu te karere, me whakamana kē te tū a te rōpu kōkiri i ngā kerēme i te tuatahi.
I whakapā atu mātou ki Te Tari o Ngā Kaitiaki Rēti Ngāhere Karauna mai i te ata nei, tae noa mai ki te ahiahi, engari kīhai rātou mo te tuku whakahoki mo te whakataunga a te Poari, me ngā kōrero i puta i te Minita Take Tiriti.
Kairīpoata: Harata Brown.
