E riri ana te whānau o tētahi kura Māori i te āhua o tētahi āpiha whakahoihoi whakatūpato i a rātou parakitihi haka ana

Kei waenganui pū i ngā whare whai rawa i Te Upoko o te Ika, e tū ana te Kura Kaupapa Māori o Ngā Mokopuna.

E ohorere katoa ana te poari, ngā kaiako me ngā whānau o te kura i te āhua o tā tētahi āpiha whakahoihoi whakatūpato i a rātou, nā te hoihoi rawa o āna whakaharatau haka.

Kaore a Jason Ake i te whakapono ki ngā kōrero i taka ana i te waha o tētahi āpiha whakahoihoi.

I te kotahi karaka i te ahiahi i te Rāhoroi i te whakarite ngā tauira o te wharekura mo o rātou whakataetae a rohe i konei i te kura. E ai ki a Jason Ake, he whakapae tā te āpiha mō rātou i tu atu i te mahi haka.

“Mea mai e ia kia noho koutou ki te panui pukapuka, ki te whakawhitiwhiti kōrero, ko te mea whakamutunga, me noho tahi koutou ki te play PlayStation āhua kakī whero tērā whakāro.”

E ai ki te Kaunihera o Te Whanganui ā Tara kua whakahē te kaimahi he kaikiri, kaipatu rānei ia. Ā, kua tono atu rātou ki te kaikirimana mō tētahi ripoata e pā ana ki tēnei take.

Hei tā Ake kua whai tautoko rātou i ētahi o ngā kainoho o konei.

“Ka tae mai te tumuaki o tērā taha, kei te tautoko mātou i a koutou na reira werohia. He kura iti mātou, engari he ngākaunui ki te hapori.”

Otirā ko te tīmanako ka kore tenei take e pā mai anō ki te kura nei o Ngā Mokopuna.