E rua marama ka noho tārewa te ratonga o Raukura Waikato

E rere ana ngā māharahara mō tētahi ratonga toko i te ora Māori kua tino taka nui ki te raru mō āna whakapaunga pūtea.  

Neke atu i te rua miriona tāra ia tau ngā pūtea kirimana ka whakawhiwhia ki a Raukura Waikato Social Services, heoi he pērā rawa te kino o āna raru i whakatārewatia tana mana ratonga e te Manatū Whakahiato Ora mō ngā marama e rua i tēnei rā.

Tōna tikanga he tari pukumahi tēnei e āwhina ana i te hunga pōkaikaha.  Heoi i te rā nei ko āna kaimahi kē kei te rapu tautoko.

E ai ki āna puka tahua, kō tata atu i te rua miriona ngā pūtea kirimana a Raukura Waikato me te Manatū Whakahiato Ora, te Manatū Ture, Poutama Aotearoa me te Poari Hauora a Rohe o Waikato.  Heoi mō ngā tau e toru kua taha, kua noho nama ana pukapuka ki te whero, i tērā tau mā tata ki te haurua miriona tāra.

Tokomaha ngā kaimahi e tatari tonu ana ki a rātou utunga kaimahi, ko ētahi e noho nama ana mā te ono wiki.  Tokorima ngā tamariki a Sheena Wallace, ā, e hapū ana ia me tana tamaiti tuaono.

I a Te Kāea i te tari o Raukura Waikato, tokomaha ngā tāngata i tae atu ki te ratonga engaru auare ake.  Ko aua kiritaki rā te māharahara nui a ngā kaimahi.

Kāti i whakapā atu a Te Kāea ki te māngai a te Poari engari kāore anō kia whakahoki kōrero mai.

E ai ki ngā whakamārama i wehe te Toihau me tana hoa rangatira, te heamana ō-mua o te Poari, i o rāua tūranga i te tīmatanga o tēnei tau.