E takahi ana a Whirimako Black i te ara whakamutu i te mahi whakaweti

E takahi ana te tohunga kaiwaiata Māori nei, a Whirimako Black i te ara whakamutu i te mahi whakaweti.

Ko tāna tamāhine, ko Mihi Ki Te Kapua tērā kua tino pākia e ngā whakaweti a tētahi tira kōhine i Te Kura Takawaenga o Whakatāne.

Nā konā tāna whakaputa kōrero ki te pae pāho kōrero me tāna toro ki te kura i te rā nei, kia tau ai te ara whakamua o tana kōtiro me ērā atu e rongo ana i te ngau o te mate nei.

Koinei te tamāhine a Whirimako Black, he kōtiro ngāwari, ngākau māhaki.  E kore rawa te tangata e mōhio i tūkinotia a Mihi Ki Te Kapua e tētahi hunga kōtiro i te kura.

E ai ki a Whirimako Black, “I kī mai rātou ka whakapā atu rātou ki ngā whānau kia noho ai mātou i roto i te rūma kotahi ka kōrerorero kia rātou ki a rātou tamariki mō ngā mamae ka eke ki runga i te tamaiti.”

I pupū ake te take nei i te whakapuakitanga o Whirimako i tēnei mahi whakaweti ki tana tamāhine ki runga i a pukamata inanahi.

Ko tōna kōrero, 'Ia rā, ia rā, ka kiia he pukunati ia, he anuanu, ā, nōna noa nei ka mekea tōna kanohi.  Kāre ia i whāki mai ki ahau, kei whakarōpū mai te hunga whakaweti.’

Ka kuraina a Mihi ki tēnei kura, he kura takawaenga e mau pū ana ki te manaakitanga.  Ā, i tūmeke katoa te tumuaki i tōna rongohanga ki te take nei.

E ai ki a Whirimako Black, “Kare rātou i mōhio i te pēnei.  I tae ki te kaiako engari kāre i tae whakarunga, i runga tonu pea he maha tonu ngā mahi e mahi ana i te kura.”

He raru tēnei kua pupū ake ki ngā kura maha i ngā tau, ā, kua kino ake i te māmā o te uru atu a te tamaiti ki ngā pae kōrero ā-ipurangi, ki reira mahi ai ā rātou mahi whakaweti.

Ki tā Black, “Kei te tango koe i te ao hurihuri o te tamaiti i mua i tona tipu, puāwaitanga me pēhea mōhio ahau maha katoa tātou i pērāhia.”

Mai rāno a Whirimako e whāngai ana i te aroha me ngā tohutohu tika ki tana tamāhine, pērā anō ki ana waiata, he tohutohu kei roto.

Ko Black tērā e mea ana, “Ētahi i heke o rātou wairua ki raro.  Ētahi mea patuhia, ētahi i te hiahia ki te whakamate i a rātou.  Kāre au i te hiahia kia pērā ki taku kōtiro.  Ko wai te mātua kei te pīrangi kia pērā rawa ki a rātou tamariki.”

Ahakoa te aha ka pakari tonu te tamāhine a Whirimako te anga whakamua.