E takatū ana ngā reo irirangi Māori mō tō rātau pō tuku taonga

E whakarite ana ngā Reo Irirangi Māori ā-Iwi o te motu ki te whakanui anō i a rātou mahi, i te putanga o ngā kōharinga o ngā tohu reo irirangi ā-iwi, rua mano, tekau mā whā ka tū ki Rotorua ā tērā wiki.

Tekau mā whitu katoa ngā wāhanga ka whakanuia i tēnei tau, ā, ko tētahi, ko te tohu hōu mō te mahi nui ki te hāpai i te reo ā-iwi. He tohu whakamaharatanga ki tētahi o ngā tino kai-hāpai i ngā reo irirangi, arā, ki a Parekura Horomia.

He reo waia ki ngā taringa puta noa i te ao irirrangi Māori. Kua waru ngā tau a Dave Kaire e mahi ana i Te Reo Irirangi o Waatea. Ko rātou anake te reo irirangi Māori i Tāmaki Makaurau e aro pū ana ki ngā reorua.

A, hei tērā wiki ka whakanuia ā rātou mahi ki te pō tuku taonga, ao ake i tā rātou whakaingoatanga ki te rārangi mō te wāhanga o Te Reo Irirangi Maori o te tau.

Hāunga ra a Irirangi Waatea, ko Maniapoto FM i Te Kuiti rātou ko Moana Radio i Tauranga, Ngati Porou, Te Korimako i Ngamotu, me Te Hiku o te Ika i Kaitaia ētahi atu o ngā toa kua whakaingoatia ki te wāhanga nei.

Nō te tīmatanga mai o te reo irirangi, e rua tekau mā whitu tau ki muri, kua tuku tākoha nui ngā reo irirangi Māori ki te orangatonutanga o te reo Māori, ā, e pērā tonu i ēnei rā.

He tata ki te toru rau rima tekau mano tāra ia tau ka whakawhiwhia ki ngā reo irirangi Māori. A, hei tērā wiki ki te pō tuku taonga, ka puta i te Minita Māori a Pita Sharples tētahi kōrero motuhake ki mua i te hunga irirangi Māori.