E tāria ana kia whakatū kura hōu ki Manurewa

Tema Hemi

Kua rite mai te whenua taurikura ki Browns Rd i te pokapū o Manurewa.  

I kii mai ā Rangi Mclean, "kei te tu tātou i runga i te whenua i whakaritehia kia whakatū te wharekura, te kura kaupapa me te kohanga reo. Mai noa atu i roto i ngā tau rua tekau mā tahi e kawe ana tēnei o ngā kaupapa."

Engari ko te hāmama tonu o Te Kura Kaupapa Māori o Manurewa me Te Wharekura o Manurewa e tāria tonu ana te wā.

Ko tā Maahia Nathan tumuaki o Te Wharekura o Manurewa, "ko te hiahia ko ngā kaupapa here, ngā ahuatanga tōrangapū o tēnā kāwanatanga tatu mai ki tēnei kāwanatanga. Ko te roa o te whakatau i te ahuatanga o ngā hātepe, o ngā pūnaha o te kāwanatanga i te taha o te tari mātauranga. Kei reira te uauatanga, kei reira ngā ahuatanga ngā taiapa pea."

I tēra tau i tukuna e te minita mātauranga e Nikki Kaye ko te rua tekau mā wha miriona tāra ki ngā kura kia hanga mai he kura hōu. Ko te āputa kia whakatūngia he hāpori reo Māori ki te tonga o Tāmaki.  

Ko tā Nathan anō, "ko te putaketanga o tenei o nga kaupapa ko te whakarauora i te tatou reo mo ake tonu atu. Kia tau te reo i o tatou mokopuna, whanau i o tatou kura."

He ai ki ā Mclean, "ngā kaitautoko mai te pōari o Manurewa nei, te kaunihera o Tāmaki Makaurau tīmata mai i ā Tā Barry Curtis, i ā Len Brown, i ā Phill Goff inaianei. Tautoko katoa rātou i te whakatū i te kaupapa nei."

I whakahaerehia te wharekura ki rō akomanga i muri i te marae ki Manurewa mai i te tau rua mano mā rua. Ko tā te kōrero ā Nathan he kōtahi rau ngā tauira i tēnei wā, me te tūpono ka tipu te tokomaha ki te toru rau ngā tauira kei te kura hōu.

Ko te kōrero whakamutunga ā Nathan, "he nui te tautoko i te āhua nei o te kaupapa, i te mea he kaupapa tēnei e whakarauora i to tātou reo. He kaupapa tēnei hei whakatū i tētahi hāpori reo Māori."

I tukuna mai e tētahi kaikōrero mā te minita matauranga Māori a Kelvin Davis ki ā mātou, me te kii mai e haere tonu ana te waihanga mai i te kura hou, ā kei roto tonu te kāwanatanga i ngā wāhanga whakahoahoa i te kura otira me te tūpono ka timata mai te hanga whare hei te tau e tū mai nei.